Сонгуулийн тухай хуульд нэмэлт өөрчлөлт оруулах тухай хуулийн төслийн анхны хэлэлцүүлэг өнөөдөр эхэлнэ. Ардчилсан намын бүлэг пропорциональ давамгайлсан холимог тогтолцоог дэмжиж байгаа бол Ардын намынхны хувьд нэгдсэн байр сууринд хараахан хүрээгүй боловч мажоритари тогтолцоо давамгайлсныг нь чухалчилж байгаа. Энэ талаар зарим гишүүний байр суурийг сонирхлоо.

УИХ-ын гишүүн С.Оюун: АРДЫН НАМЫНХНЫ САНАЛЫГ ДЭМЖВЭЛ СОНГУУЛИЙН ТУХАЙ ХУУЛИЙГ ШИНЭЧИЛЖ ЧАДАХГҮЙ ГЭСЭН ҮГ

-Иргэний зориг-Ногоон нам пропорциональ тогтолцоо да­вам­­­гайл­сан хувилбарыг дэм­жиж байгаа. Одоо яригдаж бай­гаа са­налуудаас 50:26 хамгийн бо­ломжтой хувилбар нь. Хэрэв энэ хувил­барыг баталж чад­вал гишүүд хоорондоо намын бодлогоороо өр­сөлдөх боломжтой болно. Хүн бүр тус тусдаа жалга дов тойрсон асуудал ярихгүй гэдгээрээ маш том давуу талтай. Харин Ардын намынхны ярьж байгаа 52:24 гэсэн хувилбарыг баталчихвал энэ нь хуучнаасаа ямар ч ялгаагүй болно гэсэн үг. Сонгуулийн тухай хуулийг өөрчилж, шинэчилье гэж бодож байгаа бол пропорциональ давамгайлсан холимог тогтолцоог гаргаж ирэх нь зүйтэй юм. Хувь тэнцүүлэхдээ дотор нь залуучууд, эмэгтэйчүүдийн гэх мэтээр квот тогтоож болно.

УИХ-ын гишүүн Д.Ганхуяг: “ИРГЭДИЙН СОНГОХ ЭРХ БАЙХГҮЙ БОЛНО” ГЭЖ АЙХ ХЭРЭГГҮЙ

-50:26 буюу пропорциональд суурилсан сонгуулийн тогтолцоог дэм­жиж байна. Үүнд хэд, хэдэн давуу тал бий. Нэгдүгээрт, сон­гогчдын саналыг хамгийн сайн тусгана. Хоёрдугаарт, орон нут­гийн эрх мэдлийг нэмэгдүүлэх бо­ломжтой. 50:26 гэсэн тоог бид санаанаасаа зохиож тавиагүй. Аль 2004 оноос хойш хийсэн судалгаанд үндэслэж гаргаж ирсэн юм. Намууд иргэдийн саналыг авахын тулд нэр дэвшүүлж байгаа хүмүүсийн нэр­сийн жагсаалтыг гаргах нь тодорхой. Тиймээс иргэдийн сон­гох эрх байхгүй болно гэж айх явдалгүй. Ер нь Сонгуулийн тухай хуулийг өөрчилснөөр сонгуулийн тоог цөөлөх гэх мэт олон асуудлыг ший­дэх боломжтой. 

УИХ-ын гишүүн Су.Батболд: СОНГОХ ЭРХИЙГ НАМД БИШ, ИРГЭДЭД ӨГӨХ ЁСТОЙ
-Сонгуулийн тухай хуулиар иргэ­дийн сонгох эрхийг баталгаажуулах явдал хамгийн чухал. Түүнээс биш намд энэ эрхийг олгож болохгүй. Америк, Англи гэх мэт хөгжлийн загвар болсон орнууд мажоритари тог­толцооноос татгалзаагүй хэ­вээр байна. Тэгэхээр энэ бас нэг юм хэлээд байгаа биз. Хэрэв про­порциональ нь шилдэг байсан бол тэд­гээр улс сонгох нь яасан бэ. Ер нь пропорциональ нь сайн, мажоритари нь муу гэж хэт туйлшрах хэрэггүй. Харин про­порциональ тогтолцоо намд сон­гох эрхийг нь олгодог гэдгийг ойл­гох хэрэгтэй. Харин холимог тогтолцоо нь энэ хоёрын сайн, муу талыг тэнцүүлж чаддагаараа давуу. Ерөнхийдөө пропорционалийг аль болох бага байлгах нь чухал. Эс тэгвэл парламентын төлөөллийг сонгох эрх нь иргэдэд биш, намд шилжих гээд байна.

УИХ дахь Ардын намын бүлгийн дарга Д.Лүндээжанцан: ОДОО ХЭРЭГЖИЖ БАЙГАА ХУУЛИЙН 100 ГАРУЙ ЗҮЙЛИЙГ ӨӨРЧИЛСӨН

-Миний хувьд мажоритарид суурилсан холимог тогтолцоог дэмжиж байгаа. Дээрээс тийм чиг өгсөн. Зарим гишүүн үүнийг эсэргүүцэж “Сонгуулийн тухай хуульд бараг өөрчлөлт орохгүй нь” гэж дүгнэж байгаа нь буруу юм. Үнэн хэрэгтээ бидний санал болгож байгаа хувилбар одоо хэрэгжиж буй Сонгуулийн тухай хуулиас 100 гаруй зүйлээрээ ялгаатай. Ер нь дэлхий дахинд намыг биш хүнийг сонгодог жишиг тогтчихоод байна. Бид түүнийг сөрөөд яах вэ. Маргааш (өнөөдөр) анхны хэлэлцүүлэг нь болж, сонгуулийн холимог тогтолцоог сонгохоор болсноо баталгаажуулна. Харин ирэх долоо хоногоос хоёр намын бүлэг хуралдаж, тооны асуудлыг шийдэх юм.