Шри Ланка дахь "Яла" үндэсний цэцэрлэгт хүрээлэнгээс олон зуун шавьж, тэр дундаа 92 төрлийн эрвээхэйг хууль бусаар гаргахыг завдсан хэргээр итали аав, хүү хоёр 200 сая ам.доллараар торгуулжээ. Цэцэрлэгт хүрээлэнгийн байгаль хамгаалагчид энэ оны тавдугаар сарын 8-нд 68 настай Луижи Феррари болон түүний хүү 28 настай Маттиа нарыг олж илрүүлсэн. Аав, хүү хоёр шавьжнуудыг тусгай бодисоор татсан бөгөөд химийн аргаар хадгалахаар төлөвлөж байжээ.

Тэднийг шавьж хууль бусаар цуглуулж, эзэмшиж, тээвэрлэсэн хэрэгт буруутгажээ. Тиймээс зэрлэг ан амьтдын эсрэг гэмт хэрэг үйлдсэнд тооцон Шри Ланка улсын түүхэнд байгаагүй өндөр торгууль ногдуулсан байна.

Цэцэрлэгт хүрээлэнгийн байгаль хамгаалагч К Сужеева Нишанта хэлэхдээ "Хэрэг гарсан өдөр зам дагуу сэжигтэй машин зогсож байгааг мэдсэн. Тухайн машинаас гарч ирсан хоёр эрэгтэй хүн шавьжны тортой ой руу орсон. Байгаль хамгаалагчид тэр автомашин дотроос шавьж цуглуулж хийсэн олон 100 сав олсон. Биднийг олоход бүх шавьж үхсэн байсан. Тэд лонхонд химийн бодис хийсэн юм билээ. 300 гаруй шавьж байсан" гэжээ.

Аав, хүү хоёрыг эхлээд 810 хэрэгт буруутгасан ч сүүлд нь 304 болж цөөрсөн байна. Тэд есдүгээр сарын 24-ний дотор торгуулиа төлөхгүй бол хоёр жилийн хорих ял авч магадгүй юм. Итали эцэг, хүү хоёр тухайн үед Шри Ланкад амарч явжээ. Хэрэг гарснаас хойш тэд тус улсад хоригдсоор байна.

Шри Ланкын зүүн өмнөд хэсэгт орших "Яла" үндэсний цэцэрлэгт хүрээлэнд ирвэс, заан, одос үхэр зэрэг олон зэрлэг амьтан байдаг. Энэ нь тус улсын хамгийн алдартай цэцэрлэгт хүрээлэнгүүдийн нэг юм.

68 настай Луижи Феррари нь шавьж сонирхогч бөгөөд хөл, шагайн гэмтлийг эмчлэх чиглэлээр мэргэшсэн мэс засалч. Итали дахь найз нөхөд нь түүнд өршөөл үзүүлэхийг гуйжээ.

Эх сурвалж: BBC