Хотын эрх зүйн байдлын тухай хуулийн төслийн анхны хэлэлцүүлгийг хийв

Монгол Улсын нийслэл Улаанбаатар хотын эрх зүйн байдлын тухай хуулийн шинэчилсэн найруулгын төсөл болон хамт өргөн мэдүүлсэн хууль, тогтоолын төслийг өнгөрсөн долоо хоногт чуулганы нэгдсэн хуралдаанаар хэлэлцэх эсэхийг хэлэлцсэн. Ийн хуралд оролцсон гишүүд 67.7 хувийн саналаар дэмжиж, анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүлсэн юм.

Тэгвэл Төрийн байгуулалтын байнгын хороо өнөөдөр тус хууль болоод хамт өргөн мэдүүлсэн хууль, тогтоолын төслийн анхны хэлэлцүүлгийг хийлээ. Энэ үеэр УИХ-ын гишүүд асуулт асууж, хариулт авсан юм. Тухайлбал, УИХ-ын гишүүн Д.Тогтохсүрэн “Нийслэлд хамгийн том тулгамдсан асуудал бол газар чөлөөлөлт. Энэ хуулиар газар чөлөөлөлт, түүний нөхөн олговрын асуудлыг хэрхэн шийдэж, авто зам, шугам сүлжээний зохицуулалтыг яаж хийж байгаа вэ. Аж ахуйн нэгжийн үүрэг, оролцоог хэрхэн оруулсан бэ. Хуулийн төсөлд дүүрэг, хорооны үүрэг төдий л байхгүй, бүх зүйлийг нийслэлд төвлөрүүлсэн байна” хэмээн асуулаа. Ажлын хэсгийн ахлагч, УИХ-ын гишүүн Ж.Сүхбаатар “Газартай холбоотой зохицуулалт хуулийн төсөлд байгаа. Улаанбаатар хотын төвд нийтийн эзэмшлийн зам, талбай, ногоон байгууламж барихаас бусад зориулалтаар газрын зөвшөөрөл олгохгүй. Газар чөлөөлөлтөд мөнгө л асуудал болоод байгаа” гэсэн бол НИТХ-ын дарга Ж.Батбаясгалан “Авто зам, шугам сүлжээтэй холбоотой асуудал Эрчим хүчний тухай хуулиар нэгдсэн системээр зохицуулагддаг учраас хэсэгчилсэн байдлаар асуудлыг тусгасан. Аж ахуйн нэгж, олон нийтийн оролцоо, хөрөнгө оруулалтыг татах, олон улсын болоод дотоодын хөрөнгийг босгож, тулгамдсан асуудлаа шийдэх бололцоог олгож байгаа. Дүүрэг, хорооны чиг үүрэгтэй холбоотой асуудлыг Засаг захиргаа, нутаг, дэвсгэрийн нэгж, түүний удирдлагын тухай хуулиар маш тодорхой заасан” гэв.