Латвийн теннисчин Эрнестс Гулбист "Ролан Гаррос"-ын хагас шигшээд шалгарч, "Их дуулга" тэмцээний оргил амжилтаа үзүүлээд байна.

"Ролан Гаррос"-ын эмэгтэйчүүдийн ганцаарчилсан төрөлд шилдгүүд халгаатай байсан бол эрэгтэйчүүдэд ч бас энэ явдал өнгөрсөнгүй. Мөн тэр хэрээр шинэ одууд ч Парисийн кортод илүүрхсэн хэвээр байна.

Тус тэмцээнд 18-т эрэмбэлэгдсэн Латвийн Эрнестс Гулбист "Ролан Гаррос"-ын хагас шигшээд шалгараад байна. Тэрээр тэмцээний арав дахь өдөр буюу өчигдөр Чехийн Томаш Бердыхийг 6:3, 6:2, 6:4-ийн харьцаагаар гурван үеийн турш буулган авснаар шигшээд өрсөлдөх эрхийн төлөө Сербийн Новак Жоковичтой тоглохоор боллоо.

Эрнестс Гулбист дөрөвдүгээр тойрогт "Их дуулга"-ын 17 түрүүт Швейцарийн Рожер Федерерийг хожиж, шөвгийн наймд шалгарч зургаад эрэмбэлэгдсэн Чехийн Томаш Бердыхийг гурван үеийн турш төвөггүйхэн буулган авснаар хагас шигшээд шалгарлаа.

Гулбист "Ролан Гаррост"-т долоо дахь удаагаа оролцохдоо 2008 онд шөвгийн наймд шалгарч байжээ. Тэрээр энэ жилийн Парисийн кортод шилдэг тоглолтуудыг үзүүлсээр "Их дуулга" тэмцээний оргил амжилтаа үзүүлээд байна. Өдгөө 26 настай Гулбист карьерийнхаа туршид дөрвөн сая орчим ам.долларыг шагналаас олоод байна.

Гулбист маргааш болох шигшээд өрсөлдөхийн эрхийн төлөөх тоглолтод "Их дуулга" тэмцээний зургаан түрүүг хүртэхдээ "Ролан Гаррос"-т хараахан түрүүлж чадаагүй Сербийн Новак Жоковичтой өрсөлдөх юм.

Өнөөдөр буюу тэмцээний 11 дэх өдөр "Ролан Гаррос"-т найман удаа түрүүлээд буй шороон талбайн хаан гэгддэг, дэлхийн манлай теннисчин Испаний Рафаэль Надаль нутгийн теннисчин Дэвид Феррертэй(5), Их Британы Энди Мюррей(7) шилдэг тоглолтуудыг үзүүлж шөвгийн наймд шалгараад байгаа Францын Гэйл Монфис(23) нарын тоглолт болох юм.

Нийт 34 сая ам.долларын шагналын сантай "Ролан Гаррос"-ын тэмцээний эрэгтэй, эмэгтэй ганцаарчилсан төрлийн аваргууд 2 сая 42 мянган ам.доллар хүртэх бол дэд аварга 1 сая 21 мянган ам.долларын шагнал хүртэнэ. Мөн тус тэмцээний эхний тойргийг давсан теннисчид 28 мянган ам.доллар, шөвгийн наймд үлдсэн бол 258 мянган ам.долларыг халааслах аж.

Ч.БОЛОР