МАН, УИХ дахь МАН-ын бүлэг, “Стратеги” Академиас “Монгол Улсын хөгжлийн бодлого” сэдэвт “Хаврын академи”-ийг энэ сарын 14-16-ны хооронд ХБНГУ-ын Фридрих Эбертийн сантай хамтран Улаанбаатар хотноо зохион байгуулах гэж байна. Энэ хүрээнд өнөөдөр “Хаврын Академи”-д урилгаар оролцож байгаа ХБНГУ-ын доктор Алфрэд Пфаллер, Норвеги Улсын эдийн засгийн ахлах судлаач, доктор Хельге Редвик нар Монгол Ардын Намын дарга, УИХ-ын дэд дарга М.Энхболд, УИХ-дахь МАН бүлгийн дарга, УИХ-ын гишүүн  С.Бямбацогт нартай уулзаж  Монгол Улсын хөгжлийн бодлогын талаар санал бодлоо солилцлоо. Уулзалтын үеэр МАН-ын дарга, УИХ-ын дэд дарга М.Энхболд Монгол Улсад эдийн засаг, нийгмийн хүндрэл нүүрлээд буй энэ цаг үед МАН хариуцлагатай, зүүн төвийн улс төрийн хүчний хувьд Монголын хөгжлийн бодлогыг шинэчлэн томъёолоход ач холбогдол бүхий “Хаврын академи”-ийг “Монгол Улсын хөгжлийн бодлого” сэдэвтэйгээр зохион байгуулж гадаадын олон оронд ажилласан туршлагатай экспертүүдийг урин оролцуулж байгааг тэмдэглээд энэ удаагийн “Хаврын академи” Монгол Улсын хөгжил дэвшилд үнэтэй хувь нэмэр оруулах бодлогыг тодорхойлно гэдэгт итгэлтэй байгаагаа илэрхийлээ.

“Хаврын академи”-ийн үйл ажиллагаа маргааш эхлэх бөгөөд нээлтийн үйл ажиллагаанд МАН-ын удирдлагууд оролцохын зэрэгцээ МАН-ын бүлгийн дарга, УИХ-ын гишүүн С.Бямбацогт, УИХ дахь МАН-ын бүлгийн дэд дарга Д.Оюунхорол, МУИС-ийн ЭЗС-ийн багш, доктор Ч.Хашчулуун, МАН-ын Эдийн засгийн хөгжлийн бодлогын газрын дарга Д.Даваасүрэн, МАН-ын Нийгмийн хөгжлийн бодлогын газрын дарга С.Чинзориг нар Монгол Улсын хөгжлийн бодлогын талаар илтгэл тавихаас гадна ХБНГУ-ын доктор Алфрэд Пфаллер, Норвеги Улсын эдийн засгийн ахлах судлаач, доктор Хельге Редвик нар өөрийн орны хөгжлийн туршлага, арга барилаас хуваалцаж илтгэл тавина. Тус арга хэмжээнээс Монгол Улсын нийгмийн хөгжлийн бодлого, эдийн засгийн хөгжлийн бодлого, засаглалын бодлого, ногоон хөгжлийн бодлогын талаар зөвлөмж гаргаж холбогдох төрийн байгууллагууд, улс төрийн намуудад хүргүүлэх юм байна.

Ш.ОЧ