Өчигдөр болж өнгөрсөн Формула-1-ийн Канадын Гран-при уралдаанд “McLaren” багийн нисгэгчид эхний хоёр байрыг эзэллээ. Тэргүүн эгнээнээс гарч уралдсан Льюис Хэмильтон нийт 71 тойрог замын 50 дугаар тойрогт “Red Bull”-ын өрсөлдөгч Марк Уэбберт гүйцэгдэх шахсан боловч Монреалын гараанд түрүү авч чадсан байна. Харин түүний багийн хамтрагч Женсон Баттон удаалжээ.

“Ferrari”-гийн Фернандо Алонсо гуравт, “Red Bull”-ын Себастьян Веттель, Уэббер нар дөрөв ба тавдугаар байрт, харин зургаад Нико Росберг хурдалжээ.

Энэхүү гараанд “McLaren”-ы хослол эхний хоёр байрыг эзэлснээр Хэмильтон 109 оноотой болж, дэлхийн аваргын төлөөх өрсөлдөөнийг ерөнхий дүнгээр тэргүүлж эхэллээ. Харин түүнээс гурван онооны алдагдалтайгаар Баттон, түүнээс дахиад гурван оноогоор хоцорч, Уэббер нар удаалж байна.

Формула-1-ийн ээлжит гараа энэ сарын 27-нд Валенсияд болно.

С.Цэлмэг