“Архигүй Хэнтийчүүд” хөтөлбөрийн нээлт Өндөрхаан хотод болж, энэ арга хэмжээнд 60 байгууллага, бүх сумын төлөөлөл нийт 3000-гаад иргэд оролцсон байна. Аймгийн төв талбай болох Чингисийн талбайд болсон хөтөлбөрийн нээлтийн үеэр аймгийн Засаг даргын орлогч бөгөөд ажлын хэсгийн ахлагч П.Баярт-Од “Хэнтий аймгийн хэмжээнд 2012 оны байдлаар согтуугаар үйлдсэн 174 гэмт хэрэг бүртгэгдсэн нь өмнөх оныхоос 10 гаруй хувиар өссөн байна. Иймд архины хамааралтай иргэдийг эрт илрүүлж, эмчлэх, нийгэмдээ тустай иргэн болж төлөвшихэд нь дэмжих, иргэдийнхээ эрүүл аюулгүй орчинд аж төрөх эрхийг хангах зорилгоор уг хөтөлбөрийг гарган хэрэгжүүлэх шаардлага зүй ёсоор тулгарсан юм. Хөтөлбөрийн үр дүнг энэ онд хагас бүтэн жилээр тооцож танилцуулна” гэсэн юм. Өөрөө архинаас гарах сэдэлтэй, архины хамааралтай иргэдийг эрүүл мэндийн байгууллагуудтай хамтран сургалт эмчилгээнд хамруулж, холбогдох  зардлыг орон нутгийн төсвөөс хариуцан дэмжлэг  үзүүлэхээр хөтөлбөрт  тусгасан байна.

 “Архигүй Хэнтийчүүд” хөтөлбөр хэрэгжүүлэхэд орон нутгийн  хөгжлийн сангаас 26,5 сая төгрөг зарцуулахаар төлөвлөжээ. Хөтөлбөрийн нээлтийн цуглаанд архины хамаарлаас ангижирсан Хэрлэн сумын иргэн Иваны Батзаяа, Тогтохбилэгийн Анхбаяр, Ганбаатар, Бухаагийн Итгэлсүрэн, Цэгмидийн Ганбат, Сүх-Очирын Энх-Од нарыг урамшуулан шагнаснаас гадна удам угсаагаараа архи хэрэглэдэггүй иргэд болох Хэрлэн сумын Лувсанцэдэнгийн Очирваань, Цэнджавын Дамдинсүрэн, Лувсан-Ишийн Ганболд, Рагчаагийн Содном, Цагаачины Тунамал-Эрдэнэ, Цэрэндуламын Энхтайван, Лхамын Энхцогт, Чакийн Бейбит нарт мөн талархал шагнал гардуулж өглөө. “Архигүй Хэнтийчүүд” хөтөлбөрийг байгууллага хамт олноороо дэмжин нээлтийн арга хэмжээнд зохион байгуулалт сайтан оролцсон аймгийн Нэгдсэн эмнэлэг, Хэрлэн сумын 3-р цэцэрлэг, “Хурх” худалдааны төвийн хамт олонд мөн талархал шагнал гардуулсан байна. Энэхүү хөтөлбөрийн хүрээнд Хэнтий аймаг архи худалдаалдаг цэгийнхээ тоог бууруулах ажээ.