Барилгын салбарт хөдөлмөр аюулгүйн ажиллагаа алдагдсанаас хүний амь насыг хохироосон хэрэг өнгөрсөн есдүгээр сард гарсны нэг нь Баянгол дүүргийн тавдугаар хороо, Шастины нэрэмжит нэгдсэн гуравдугаар эмнэлгийн баруун талд баригдаж байсан барилгатай холбоотой. Тодруулбал, уг барилгыг барьж байсан өргөгч кран хугарч унаснаас 12 настай Б.Есүгэн охин амиа алдсан юм. Харин охины аав Б.Батсайхан хоёр хоногийн өмнө Монгол Улсын Ерөнхийлөгчид хандан захидал бичиж, монгол хүний аюулгүй орчинд амьдрах баталгааг хангахын тулд тодорхой хуулиудад өөрчлөлт хийх шаардлага байна гэсэн хүсэлт гаргасныг төрийн тэргүүн хүлээн авч, өнөөдөр түүнтэй биечлэн уулзлаа. Энэхүү уулзалтад Монгол Улсын Ерөнхийлөгч Ц.Элбэгдорж, Б.Батсайхан, Барилга хот байгуулалтын сайд Ц.Баярсайхан, Хууль зүйн сайд Х.Тэмүүжин, УИХ-ын гишүүн Л.Эрдэнэчимэг,  нийслэлийн Засаг дарга бөгөөд Улаанбаатар хотын захирагч Э.Бат-Үүл нар оролцлоо.

Барилгын салбарт гарсан ослуудыг авч үзвэл 2007 онд 73 хэрэг гарч 40 хүн амиа алдсан бол 2008 онд 73 хэрэг бүртгэгдэж 18 иргэн амиа алджээ. Мөн 2010 онд 37 хэрэг гарч, 21 иргэн амиа алдсан бол 2011 онд 46 хэрэг бүртгэгдэж 19 хүн амиа алдсан байна. Харин энэ оны есдүгээр сарын байдлаар 99 хэрэг гарснаас 39 иргэн амиа алджээ. Энэ нь барилгын салбарт өнгөрсөн жилүүдэд ч энэ төрлийн гэмт хэрэг гарч байсны нотолгоо юм. Цаашид иргэнийхээ аюулгүй орчинд аж төрөх эрхийг хангаж ажиллахын тулд төрийн төвшинд юуг анхаарах шаардлагатай талаарх зөвлөмжийг Ерөнхийлөгч мөн албаныханд өглөө. Ингэхдээ жил бүрийн есдүгээр сарын 3-ны өдрийг Есүгэн охины дурсгалыг хүндэтгэх өдөр болгож, монгол хүний амьд явах эрхийг ярьдаг, аюулгүй орчинг хангаж ажиллах чиглэлээр ахиц дэвшил гаргаж,  салбар бүр ажлаа дүгнэдэг байх ёстой гэсэн юм. Тэр дундаа осол гаргасан аж ахуйн нэгжийн удирдлага, осол аваар гарахаас урьдчилан сэргийлэх чиглэлээр хяналт тавих ёстой төрийн эрх мэдэлтнүүдэд хариуцлага тооцдог механизмд шилжих ёстойг санууллаа. Мөн төр зөвшөөрөл олгож, мөнгөтэй хөрөнгөтэй хүмүүс дээр тоглолт хийн хөлжиж суудаг хариуцлагагүй байдлыг халах ёстойг ч онцоллоо. Үүний тулд хууль санаачлагч субьект бүр хариуцлага тооцох асуудлыг нарийвчлан оруулж ирэх ёстой гэж байна. тухайлбал, хариуцлага алдсан албан тушаалтан нь албан тушаалаасаа шууд чөлөөлөгдөж, төрийн албанд ажиллах эрхийг нь хэдэн жилээр хасах. Торгууль ногдуулах, тэр байтугай Эрүүгийн хариуцлага хүлээлгэх хэмжээнд асуудлыг авч үзэх ёстой гэсэн юм.

Харин Барилга хот байгуулалтын сайд Ц.Баярсайханы тайлбараар болж өнгөрсөн осол аваартай холбогдуулж салбарын хэмжээнд асуудлыг авч үзэхэд хөрөнгө мөнгөтэй хүмүүс хүч түрэн орж ирсэн нь эргээд хариуцлага сулрахад хүргэжээ. Тухайлбал, барилгын компаниуд зөвшөөрөлгүйгээр барилга барьдаг, хөдөлмөр аюулгүйн ажиллагааг хангаж ажилладаггүй. Ийм алдаа дутагдал байгааг нь мэргэжлийн хяналтаас сануулсаар байхад түүнийг нь үл ойшоодог. Хохирогчид хохирол учруулсан аж ахуйн нэгж хохирлыг нь барагдуулдаггүй, ийм даатгалын тогтолцоо ч манайд байдаггүй. Тиймээс хохирогчид олгох даатгалын тогтолцоог бий болгох, барилгын салбарт хөдөлмөр аюулгүйн ажиллагааг хангаж ажиллахын тулд явуулаар сургалт зохион байгуулж, үнэмлэх олгох. Үнэмлэхгүй ажилтнаар барилга бариулахгүй байх. Барилгын салбар дахь норм норматив, дүрмийг шинэчлэх, иргэдийн амь нас аюулгүй байдлыг хангах чиглэлээр тус бүр хуулийн төсөл боловсруулж байгаа гэлээ.

Хууль зүйн сайд Х.Тэмүүжиний хувьд амь насаа алдсан иргэний ар гэр дахин дахин хохирч, харин төр нь хохирсон иргэн, хариуцлага алдсан компани хоёрын дундах харилцаанаас ашиг олж, түүгээр нь төсвөө зузаалж байгаа гажиг тогтолцоо үйлчилж байгааг санууллаа. Уг нь эрүүгийн хуульд иргэний амь насыг хохироосон бол тухайн компани хөдөлмөрийн хөлсний доод хэмжээг 250 дахин нугалсантай тэнцэх хэмжээний торгууль ногдуулна гэж заасан байдаг аж. Энэ тохиолдолд 36 орчим сая төгрөг амиа алдсан хохирогчийн ар гэрийхэнд оршуулгын зардал болж очих ёстой. Гэвч энэ заалт бараг хэрэгждэггүй, төсвийн данс руу л ордог гэнэ. Нөгөө талаас шүүгч нар ийм төрлийн хэрэг дээр дутуу дулимаг ажиллаж байна гэсэн шүүмжлэлийг Хууль зүйн сайд хэллээ. Учир нь өнгөрсөн есдүгээр сарын 3-ний өдөр гарсан хэрэг явдлыг авч үзэхэд өргөгч кран ажиллуулж байсан жолоочийг л буруутгаснаас бус аюулгүйн ажиллагааг мөрдүүлж ажиллаагүй компани, тэр дундаа ашиг олж байгаа тухайн компанийн эзэн, хяналт тавьж ажиллах ёстой төрийн албаны албан тушаалтанд ямар ч хариуцлага ногдуулаагүй юм байна. Тиймээс Эрүүгийн хуульд эрс шинэчлэл хийх хүрээнд энэ гажгуудыг засч, торгууль төлөх бол төрийн албан тушаалтан түүнээс нь хуваалцаж төлдөг байх, хохирогчид нөхөн төлбөр шууд очдог байх зэргээр өөрчлөлт хийхээр ажиллаж байгааг онцоллоо. Ингэхдээ хариуцлагыг чангатгахаа сануулсан юм.

Монгол Улсын Ерөнхийлөгчийн зүгээс хууль санаачлагч субьект бүр хуулийн төсөл санаачилсан бол түүндээ хариуцлага тооцох заалтыг арван хуудсаар оруулж ирэх ёстой гэсэн юм. Ийнхүү дээрх уулзалт өндөрлөлөө.