УДЭТ өвөл цагийн нээлтээ дэлхийн утга зохиолын ноён оргил болсон У.Шекспирийн “Гамлет” жүжгээр нээхээр бэлтгэлдээ ороод байгаа билээ. Тус жүжгийг УДЭТ-ын ерөнхий найруулагч Н.Наранбаатар найруулж байгаа ба тэрбээр өнгөрсөн наймдугаар сард гол дүрүүдэд сонгосон жүжигчдээ зарласан. Гэхдээ тус жүжгийн  Офелиягийн дүрийг жүжигчдийн дунд сонгон шалгаруулалт зарлан явуулахаар болсон юм. Тэгвэл өнөөдөр Офелиягийн дүрийн шалгаруулалт болж, УДЭТ-ын залуу жүжигчин А.Ганчимэг тодорч жүжигчин бүрийн хүслэн болсон ур чадвар шаардсан дүрийг амилуулахаар боллоо. Түүний орлон тоглогчоор УДЭТ-ын жүжигчин, Соёлын тэргүүний ажилтан Д.Ганцэцэг сонгогдлоо.

“Гамлет”-ын Офелиягийн шалгаруулалтад УДЭТ-ын жүжигчин Д.Ганцэцэг, М.Тогтохжаргал, Б.Баярмаа, Д.Ганцэцэг, Т.Хулан, А.Ганчимэг, Б.Одончимэг, Н.Цэнгэлжаргал, ХБНГУ-ын урлагийн сургууль төгссөн жүжигчин Г.Ариунболор гээд нийт арван жүжигчин өрсөлдсөн юм. Тэд Офилиягийн  галзуурдаг хэсгийг тайзнаа тоглон өрсөлдсөн юм. Учир нь тус жүжгийн энэ хэсэг нь жүжигчдээс илүүтэй ур чадвар шаарддаг тул шүүгчид ийнхүү сонгожээ. Шүүгчдийн бүрэлдэхүүнд УДЭТ-ын ерөнхий шүүгч, тус жүжгийн найруулагчаар ажиллаж буй Н.Наранбаатар, ассент найруулагч Ч.Түвшин, ерөнхий зураач Б.Ганхуяг, бүжиг дэглээч Х.Төгсөө, нарийн бичгийн дарга Р.Оюунтөгс нар ажиллалаа.

Алдарт “Гамлет” жүжгийн гол дүр буюу Гамлетад УДЭТ-ын жүжигчин С.Болд-Эрдэнэ тоглохоор сонгогдсон бол түүний ээж Гертугтагийн дүрийг Гавьяат жүжигчин У.Уранчимэг амилуулан, Клаудид Төрийн соёрхолт Д.Сосорбарам, Полонийд Гавьяат жүжигчин Д.Жаргалсайхан  нар тоглох юм.