АНУ-ын Ерөнхийлөгч Барак Обама өчигдөр тус улсын үндэсний аюулгүй байдалд хохирол учруулж болзошгүй гэдэг шалтгаанаар Хятадын “Ralls Corp” фирмийн  Орегон мужид хийхээр төлөвлөж байсан  салхин сэнс барих  төслийг зогсоох шийдвэр гаргасан байна. Энэхүү шийдвэр нь  АНУ-ын хувьд өнгөрсөн 22 жилийн хугацаанд гадны хөрөнгө оруулалтыг хаасан анхны тохиолдол болжээ. Хятадын “Ralls Corp” хэмээх хувийн фирм энэ жилийн эхэн үеэс Америкийн тэнгисийн цэргийн баазуудын ойролцоо салхин сэнс барих дөрвөн ч төслийг эзэмших болсон аж.

Ерөнхийлөгч Барак Обамагийн гаргасан дээрх шийдвэр нь АНУ-д цахилгаан үүсгүүр барих “Sany” группт ч хамаарах гэнэ. Энэ талаар “Цагаан ордон”-оос мэдэгдэхдээ “Бидэнд Хятадын “Ralls Corp” фирмийн АНУ-ын үндэсний аюулгүй байдалд хохирол учруулж болзошгүй талаар баттай нотлох баримт байгаа”  гэжээ. Харин шинжээчдийн үзэж буйгаар энэ нь Хятад улсын дургүйцлийг хүргээд зогсохгүй сүүлийн үед хоёр орны хооронд үүсээд буй худалдааны маргаанд  нөлөөлж магадгүй юм. Ажиглагчдын дунд Барак Обамагийн уг шийдвэр нь ирэх арваннэгдүгээр сард болох АНУ-ын Ерөнхийлөгчийн сонгуультай холбоотой гэх таамагч байгаа ажээ.