Зам, тээвэр, барилга, хот бай­гуу­лалтын сайд Ц.Дашдорж өнгөрсөн долоо хоногт орон сууцны метр квадратын үнийг бууруулах тушаал гаргахаа мэдэгдсэн. Тэрбээр “Байрны метр квадратын хамгийн боломжит үнийг 980.000-1 сая 181 мянган төгрөг гэж тооцон, ойрын хугацаанд дээрх тушаалыг батлахаар зэхэж байна. Ер нь энэ сарын 10 гэхэд асуудлыг шийдэх боломжтой. Тэгэхээр ба­рил­гын  компаниуд сайдын тушаалыг мөр­дөх л учиртай. Үгүй бол аж ахуй нэгжүүд шинэ бүтээн байгуулалтын хөтөлбөрт хамрагдах эрхгүй болно  гэсэн үг” хэмээн “Шинэ бүтээн байгуулалт ба барилгын салбар” сэ­дэвт хэлэлцүүлгийн үеэр хэлсэн. Өөрөөр хэлбэл, үнэ хөөрөгдөөд буй барилгын компаниудыг чан­галах, байрны үнийг тогтвортой байл­гах, бууруулах үүднээс ийм шийд­вэр гаргахаар болсон аж. Түү­ний саналыг Монголын ба­рилгачдын холбоо, Барилгын хөгж­лийн үндэс­ний нэгд­сэн төв зэрэг салбарын удирдах бай­гууллагууд хүлээн зөвшөөрч буй­гаа мэдэгдэв. Сайд Төрийн ор­донд маргааш болох Барилгын сал­ба­рынхны удирдах ажилтны улсын зөвлөлгөөний үеэр энэ тухай албан ёсоор мэдэгдэнэ.

Ямартай ч шийдвэр гаргах эрхтэй байгууллагуудаас байрны үнийг хямдруулах шийдвэр гар­гахад бараг бэлэн болчихлоо гэсэн үг. Гэтэл барилгын комданиуд нь хувийн хувийн өмчит аж ахуйн нэгж юм. Тиймээс Ц.Дашдорж сайдын гаргах гэж буй тушаалд тэд ямар байр суурьтай байгааг сонирхлоо.

Барилгын компаниудын төлөөл­лүүдтэй уулзаж, сэтгэгдлийг нь сон­соход ихэнх нь дургүйцсэн байр суурьтай байсан юм. Мөн барилгын үнэ ханшийг бага зэрэг бууруулах, цаашид үнийг тогтвортой барих өөр боломжийг ч тэд хэлж байв. Түүнчлэн “Барилгын үнэд төр нөлөөлбөл сайн зүйл болохгүй” хэмээн нэгэн менежер хэлсэн. Мон­голын барилгын салбарт нэлээд олон жил үйл ажиллагаа явуулж буй “Өндөрбуянт холдинг” компанийн эдийн засагч, зураг төслийн инженер Н.Батцэнгэлтэй уулзаж байр суу­рийг нь сонслоо. Энэ компанийн барьсан орон сууцны метр квадратын үнэ 1.6-1.9 сая төгрөг байгаа. Тэрбээр “Манай компани 1997 онд байгуулагдаж, барилгын сал­барт 2000 оноос үйл ажиллагаагаа явуулсан. Харин 2008 оноос орон сууцны барилга барьж бай­на. Сайдын гаргах гэж байгаа ту­шаал онолын үүднээс боломжгүй зүйл. Учир нь барилгын салбар гэдэг бол зах зээлээс маш их хамааралтай. Үнэ хэзээ яаж ч өөрчлөгдөж болно. Өөрөөр хэлбэл, бусад бараа бүтээгдэхүүний үнэ ханш хэрхэн хэлбэлзэхээс хамаарч барилгын үнэ ч гэсэн хувьсаж болдог. Түүнчлэн барилгын салбарын ажил­­чид маш олон. Тиймээс хүнс­ний бараа бүтээгдэхүүний үнэ нэ­мэхээр ажилчдынхаа цалинг нэмэх шаардлага зайлшгүй гарна. Тиймээс шатахуун, бусад барааны үнийг төрөөс бодлогоор хянах хэрэгтэй” хэмээсэн. Хүмүүсийн амьдрал бүхэлдээ биш юм гэхэд тодорхой хэмжээгээр мэдэгдэхүйц дээшилж байгаа. Амьдрал нь дээшлэхийн хэрээр чанартай, өнгө үзэмжтэй орон сууцанд амьдрах хүн мөн ихэснэ. Гэтэл Ц.Дашдорж сайдын тушаал чанартай байранд аж төрөх баталгааг багасгаж байгаа талаар барилгын компаниудын төлөөлөл дурьдаж байсан. Тэд “Сайн чанарын материалыг холоос тээвэрлэхэд тэр хэмжээгээр зардал гардаг. Тиймээс нэг сая төгрөг дотор метр квадратын үнийг эргэлдүүлбэл зарлагаа нөхөж чадахгүйд хүрнэ” гэж байлаа.

Мөн “Есөн талст оргил констракшн” ХХК-ийн инженер Н.Гансүхтэй уулзаж саналыг нь сонсоход байрны үнийг заавал тогтсон үнээр барих хэрэггүй, өөр хувилбар байгааг хэлсэн. Тус компани 1998 оноос үйл ажиллагаа явуулж эхэлсэн аж. Тиймээс барилгын салбарын  алдаа, оноог сайн мэдэх компаниудын нэг гэнэ. Тэрбээр “Барилгын үнийг тогтооно гэвэл эхлээд газрын зэрэглэл, бүсчлэл, байрны чанар, хийцээр нь ангилах хэрэгтэй. Тэгж байж бодит үнэ нь гарч ирнэ. Түүнээс биш өндөр үнэтэй материалаар чанартай барилга барь­чихаад түүнийгээ гайгүй үнэлэх гэхээр тушаалд захирагдаад үнээ нэмж чадахгүй бол тэр компани дампуурахад хүрнэ шүү дээ. Гэхдээ одоогийн ханш тийм ч өндөр биш. Ер нь метр квадрат нь 1.2 сая төгрөг байх бүрэн боломжтой. Мөн байрны үнийг илүү тогтвортой барина гэвэл дотоодод үйлдвэрлэх боломжгүй, импортын материалын гаалийн албан татварыг хөнгөлөх, компаниудаас авч буй НӨАТ-ыг багасгах зэрэг арга хэмжээг төрөөс авах хэрэгтэй” гэлээ. Түүнчлэн метр квадрат нь одоо­гийн ханшаар хоёр сая төгрөгөөс дээш үнэтэй байгаа барилгын зарим компанийн төлөөллөөс энэ талаар тодрууллаа. “Тектоник” компани “Khancvill” хотхоныг нийслэлийн Хан-Уул дүүргийн нутаг дэвсгэрт барьж буй. Одоогоор барилгын гүй­цэтгэл нь 30 хувьтай байгаа аж. Бүх хийц нь цутгамал ханаас бүтэж байгаа болохоор метр квадратын үнэ нь ч гэсэн өндөр. Тус компанийн борлуулалтын менежер Г.Аззаяа “Байрны үнийн дээд хязгаарыг 1.9 сая төгрөгөөр тогтооно гэдэг бол байж болохгүй асуудал. Хэрэв тэр шийд­вэр батлагдчихвал барилгын ком­паниудын өрсөлдөөн гэж байхгүй болно. Манайх барилгын материалаа Герман, Өмнөд Солонгос зэрэг улсаас чанартай бүтээгдэхүүн авчирдаг. Тийм болохоор хэрэглэгчдээ сайн чанарын орон сууцаар хангадаг гэж болно. Манай барилгын метр квадратын үнэ одоо 2-2.5 сая төгрөг байгаа” хэмээв. Мөн “Гангар инвест” компанийн барьж буй “Ногоон төгөл хотхон”-ы метр квадратын үнэ нь 1.9 сая төгрөг. Тус компанийн менежер н.Гэрэлээ Г.Аззаягийн хэл­сэнтэй утга нэг хариулт өгсөн юм. Ямартай ч барилгын компаниуд Зам, тээвэр, барилга, хот байгуулалтын сайдын гаргах гэж буй тушаалд шүүмжлэлтэй хандаж бай­на. Гэвч нөгөө талаар иргэдэд ашиг­тай нь ойлгомжтой. Тиймээс мар­гааш бо­лох Барилгын салбарын удир­дах ажилтны зөвлөгөөн дээр ямар тушаал батлагдахыг хүлээх л үлдлээ.