Ширээний теннисний багийн 51 дэх удаагийн дэлхийн аварга шалгаруулах тэмцээн Герман улсын Дортмунд хотноо үргэлжилж байна. Тэмцээнд эрэгтэй 120, эмэгтэй 96 орны баг оролцож байгаа юм.

Монголын багийн тухайд эрэгтэй, эмэгтэй багийн бүрэлдэхүүнтэй оролцож байгаа бөгөөд багийн даргаар Монголын ширээний теннисний холбооны Ерөнхий нарийн бичгийн дарга Ч.Амарсанаа, багийн ахлах дасгалжуулагчаар А.Мэндбаяр (МШТХ-ын тэргүүлэгч гишүүн), ахлах дасгалжуулагчаар С.Галбадрах, туслах дасгалжуулагчаар Б.Цэрэнтогтох нар ажиллаж байна.

Сануулахад, Монголын ширээний теннисний шигшээ багийн эмэгтэй тамирчид 2010 онд Москва хотод болсон багийн ДАШТ-ний Д хэсэгт 15 багаас хоёрдугаар байрт орсноор энэ оны ДАШТ-д ангилал ахиж, С хэсэгт орсон байгаа бол эрэгтэй багийн тухайд өмнөхийн адил сүүлийн хэсэгт өрсөлдөж байна.

Эмэгтэй багийн тухайд групп С-д багтаж Канад, Мексик, Ирланд, Иран болон Армяны багтай тоглосон бөгөөд хараахан хожил авч чадсангүй. Харин хэсгийн дараагийн тоглолтод Латвийн багтай тоглосон ч 1:3-аар ялагдал хүлээснээр 50-60-р байрын төлөө тоглохоор болж байна.

Хэдийгээр эрэгтэй баг сүүлийн групп E-д Киргизстан, Тринидад ба Тобаго, Либери, Куракао, Фароэн арлуудтай таарсан ч бүх өрсөлдөгчөө хожсоноор хэсгээ 10 оноотойгоор тэргүүллээ.

Гуравдугаар сарын 26

Монгол – Ирланд  3:0
Монгол – Тринидад ба Тобаго 3:2

Гуравдугаар сарын 27

Монгол – Либери 3:0
Монгол – Киргызстан 3:1

Гуравдугаар сарын 28

Монгол – Куракао 3:0

Эрэгтэй багт ОУХМ Л.Алтантулга, спортын мастер Э.Лхагвасүрэн, спортын дэд мастер Б.Баатарсүрэн, Б.Билэгт, А.Батдэлгэр нар өрсөлдөгчөө буулган авсан байна.

Хэсгээ тэргүүлсэн эрэгтэй баг нөгөө хэсгээс гарч ирсэн Исландыг 3:1-ээр буулган авч Ямайкийн багтай тоглохоор боллоо. Ямайкийн багийг хожвол хэсгийн аваргын төлөө буюу 97-98-р байрны төлөө тоглож чансаагаа ахиулах боломжтой болох юм.

Ширээний теннисний багийн дэлхийн аварга шалгаруулах тэмцээний аваргууд дөрөвдүгээр сарын 1-нд тодорно.

Тэмцээний талаарх дэлгэрэнгүйг ЭНД дарж үзнэ үү.