Энхрий цэцэгсийн “далавч”-ийг эмрэх сэдэл байвч хүрч үл чадам тийм торгон, бүсгүйн үсний түрлэг хацарнаа буувал хийсгэж үл чадам тийм тансаг. Ийн хэлэх учир нь энэхүү бүсгүйн гоо үзэсгэлэн, дотоод ертөнцийн агаар мандлаар аялуулах зураач Ж.Мөнхцэцэгийн “Зүрхнээсээ” уран бүтээлийн үзэсгэлэн Занбазарын нэрэмжит Дүрслэх урлагийн музейд болох гэж байна. Гуравдугаар сарын 14-28-ны хооронд үргэлжлэх үзэсгэлэнд зураачийн зотон тосоор бүтээсэн 16 уран бүтээл, есөн ширхэг хүрэл баримал, таван ширхэг цаасан зургийг дэлгэх юм. Харин дэглэлтийн тухайд орчин үеийн буюу “контемпорари” урлагийн чиг хандлагыг шингээсэн байх гэнэ.

Урчуудын эвлэлийн хорооны шагналт зураач Ж.Мөнхцэцэгийн бие даасан “Зүрхнээсээ” үзэсгэлэн нь Монголын урлагийн зөвлөл үүсэн байгуулагдсаны 10 жилийн ойн хүрээнд нийт 15 шинэ төслийг санаачлан хэрэгжүүлж буйн нэг ажээ.