Кот д’Ивуарын довтлогч Дидье Дрогба Английн Премьер лигт 100 дахь гоолоо оруулж, “Цэнхрүүд” Стэмфорд Бриж цэнгэлдэхдээ “Стоук Сити”-г 1:0 харьцаатай буулган авлаа. Багийн удирдлага португаль мэргэжилтэн Андре Виллаш-Боашийг ажлаас нь халснаар багийн дасгалжуулагчийн албыг түр хаших болсон Роберто ди Маттеогийн удирдлага дор “Челси” анхны тоглолтоо хийж, анхны ялалтаа авсан нь энэ байлаа. Ингэснээр тэд “Арсенал”-тай оноо тэнцэж, хүснэгтийн гуравдугаар байрт бичигдээд буй “Тоттенхэм”-ээс дөрвөн онооны зөрүүтэй болж, Аваргуудын лигийн байрлал руу дөхлөө. Гэхдээ Лондонгийн “Их буучид” даваа гаригт “Ньюкасл”-тай тоглох хуваарьтай байгаа.

“Тоттенхэм”-ийн тухайд бямба гаригийн үдэш “Эвертон”-ы талбайд 1:0-ээр хожигдож, лигийн гурав дахь дараалсан ялагдлаа хүлээсэн юм.