Мэдээлэл, шуудан, харилцаа холбоо, технологийн газар, Монголын мэдээлэл, техник технологи хөгжүүлэлтийн холбоо хамтран хамтын ажиллагааны санамж бичигт өнөөдөр  гарын үсэг зурлаа. Энэхүү санамж бичиг нь Монгол Улсад компьютер техник хангамжийн мэргэжилтэн, тэр дундаа засвар үйлчилгээний чиглэлээр дагнан мэргэшсэн ажилтныг бэлтгэх, энэ чиглэлээр үйл ажиллагаа явуулдаг байгууллагуудад сертификат олгох асуудлыг  албан ёсоор шийдэх зорилготой гэнэ.  Өөрөөр хэлбэл компьютер , техник, хангамжийн нийлүүлэлт болон засвар үйлчилгээний талаарх үйл ажиллагааг цогцоор нь хянах ажээ.  Ийнхүү нэгдсэн зохион байгуулалтанд орж байгаа нь хүмүүсийн хэрэгцээг бүрэн хангаж чадах үйл хэрэг болно хэмээн албаныхан онцолж байна.

Энэ талаар Мэдээлэл, шуудан, харилцаа холбоо, технологийн газрын дарга Ж.Бат-Эрдэнээс тодрууллаа.

-Сертификат олгох болсон нь компьютерийн техник хэрэгсэл худалдаалагчид болон засварчдын хувьд хариуцлагын асуудал байх? 

-Тэгэлгүй яахав, энэ бол нэн тэргүүний ач холбогдол. Монголд гэлтгүй дэлхийд комюьютер, техник технологи бусад хэрэгсэлтэй холбоотой олон төрлийн бүтээгдэхүүн худалдаанд гарч, орж ирж байна. Энэ бүтээгдэхүүн нь мэдээж чанарын шаардлага хангасан, олон улсын стандартад нийцсэн байх ёстой. Хүмүүс хэрэгцээт бараа бүтээгдэхүүнээ олоод авсан ч дараа нь засвар үйлчилгээний асуудалд өртөөд, засуулсан ч сэтгэл дундуур үлддэг. Чухам энэ төрлийн үйлчилгээ явуулж байгаа хүмүүс, аж ахуй нэгжүүдэд сертификат олгож, чанарыг шаардаж байгаа юм. Нөгөөтэйгүүр энэ чиглэлээр дагнасан мэргэжилтэн бэлтгэх зайлшгүй шаардлага урган гарч ирж байна. Тиймээс мөн сургуулиудтай хамтарч ажиллах тухай санамж бичигт тусгаснаараа онцлог юм.

-Энэ хүрээнд тодорхой  ямар ажлуудыг хийх вэ?

-Монгол Улсын болон Олон улсын чанарын шаардлага, стандартыг дотоодын аж аухйн нэгжийн үйл ажиллагаанд нэвтрүүлэх ажлыг хийх, мэдээлэл технологийн салбарт үндэсний брэндийг дэмжин сурталчилна. Түүнчлэн энэ чиглэлээр үйл ажиллагаа явуулж буй  аж ахуй нэгж, иргэдийг бүртгэн, засварчны гэрчилгээ олгох зэрэг ажлуудыг хийх юм.