Монголын жүдочид өнгөрсөн жил нутагтаа болсон ДАШТ-ий багийн тэмцээнд түрүүлсэн Францын шигшээ багийг буулган авлаа. Хэдийгээр дэлхийн аварга болсон бүрэлдэхүүнээс нь хэд хэдэн тамирчин Францын багт байгаагүй ч ихэнх жингийн нэг, хоёр номерын бөхчүүд нь монголчуудын эсрэг зогссон. Монголд ирсэн франц жүдочдоос Уго Легран ханиадын улмаас зочид буудалдаа үлдсэн бол Тедди Ринье, Тьерри Фабре нар нь уулзалт барилдаанд үзэгчээр оролцов. Монголын багт ч олимпийн аварга Н.Түвшинбаяр, дэлхийн аварга Х.Цагаанбаатар, энэ жил Парисын “Их дуулга”-д түрүүлсэн С.Ням-Очир нарын шилдгүүд барилдаагүй юм.

 Монголд хамтарсан бэлтгэл хийхээр ирсэн Француудаас хоёр, Монголоос хоёр баг гарч, нөхөрсөг тэмцээнд барилдлаа. Монголын II баг Францын I багтай эхэлж өрсөлдөхөд 60 кг-д Азийн аварга Г.Болдбаатар Европын аварга Софиан Милоуг, 66 кг-д Б.Хишигбаяр Давид Ларосыг хожсоноор монголчууд 2-0-ээр хошуучилж эхэлсэн ч дараагийн дөрвөн бөх маань бүгд ялагдав. 73 кг-д Г.Пүрэвдорж Жиль Бонхёмд, 81 кг-д Н.Дагвасүрэн Аксель Клергед, -100 кг-д Э.Энхбат Сириль Маред, +100 кг-д Б.Сугаржаргал Мэтью Торелд тус тус дийлдсэн.

Дараа нь Монголын I баг Францын II багийг 4-2-оор хожлоо. Францын зарим тамирчин энэ барилдаанд оролцох боломжгүй болсон учраас I багийнхан нь нөхөж хүч үзсэн. Монгол-Францын халз барилдааны хоёр дахь тулаанд 60 кг-д Д.Төмөрхүлэг Иссам Нурыг, 66 кг-д С.Мияарагчаа Пьер Дупраг ялж, Г.Одбаяр Жиль Бонхёмд, Г.Түвшинжаргал Аксель Клергед дийлдсэнээр дөрвөн барилдааны дараа ялалтын харьцаа 2-2 болон тэнцсэн. Харин Б.Тэмүүлэн С.Марег цаг сунгаж, Н.Батсуурь М.Торелийг торгуулиар хожин Монголын багт ялалт авчирсан.

Ялсан хоёр баг тэргүүн байрын төлөө өрсөлдөх байсан ч Францын дасгалжуулагчийн хүсэлтээр зөвхөн 60 кг-ын тамирчдын барилдаанаар ялагчийг тодруулахаар болсон юм. Ингээд Д.Төмөрхүлэг Софиан Милоуг вазаригаар илүүрхэн Монголын багт ялалт авчирсан юм.

Гуравдугаар сарын 15-нд Францын эмэгтэйчүүдийн шигшээ багийн тамирчид Монголын бүсгүйчүүдтэй халз барилдаан хийнэ. Өнгөрсөн багийн дэлхийн аварга болсон француудаас дэлхийн гурван удаагийн аварга Люси Декос, дэлхийн аварга Одри Чеумео, ДАШТ-ий олон медаль Фредерик Жоссине нарын шилдгүүд Монголд иржээ. Түүнчлэн Тунис, Хятад, Шведийн жүдочид энэхүү хамтарсан бэлтгэлд хүч нэмэн оролцох тухай Монголын жүдо бөхийн холбооноос мэдээллээ.