Загвар өмсөгч, фото модель М.Мөнхжаргал тайзнаа эргэн ирлээ. Гэхдээ тэрбээр загварын тайзнаа гунхан, рекламанд тоглохыг урьтал болгосонгүй. Харин Монголын рок попын түүхэнд өөрийн байр сууриа эзэлсэн “Камертон” хамтлагийн залгамж халааг төрүүлэх “Камертон-2” шоуны хөтлөгчөөр ажиллахаар болжээ. Нэгэн цагт хөөрхөн царай, ухаалаг яриагаараа бусдаас онцгойрч байсан, фото мисс М.Мөнхжаргал хүний эхнэр болж, үрийн зулай үнэрлэн, нам гүмхэн байх болсон. Гэхдээ Хүмүүнлэгийн ухааны их сургуулийг олон улсын сэтгүүлчээр төгссөн түүнд энэхүү шоуг хөтлөх нь мэргэжлийн талаас нь ч нөлөөлсөн бололтой. Оролцогч залуусыг хөглөн, урам хайрлан хөгжилтэй яриагаараа тэднийг зоригжуулах тэрбээр энэхүү шоуны “шигтгээ” нь болж байлаа.