3,423.28
Энэ хичээлийн жилд 36.000 орчим сурагч Ерөнхий боловсролын сургуулийг дүүргэх ажээ. Өдгөө үргэлжилж буй Элсэлтийн ерөнхий шалгалтын бүртгэл дөрөвдүгээр сарын 16-ны даваа гаригт дуусах юм байна. Элсэгчдэд зориулсан шинэ мэдээлэл дуулгахад, өчигдөр элсэлтийн шалгалтын хуваарь эхний байдлаар гарсан байна. Хэдийгээр энэ хуваарь эцэслэн батлагдаагүй ч нэг их өөрчлөлт орохгүй гэсэн мэдээллийг албаныхан өгч байна.Элсэлтийн шалгалтын хуваарь:
6 дугаар сарын 8-нд Орос хэл, Хими, Англи хэл
6 дугаар сарын 9-нд Түүх, Математик, Биологи
6 дугаар сарын 10-нд Газарзүй, Нийгэм, Физик
Монголын их, дээд сургуулиудын консерциумаас жил болгон оюутан элсүүлэх журамд өөрчлөлт оруулдаг. Нэмэлт мэдээлэл хүргэхэд, энэ жилийн тухайд зарим сургуулиуд босго оноогоо тусгайлан зааж өгчээ. Өмнөх жилүүдэд босго оноо ерөнхийдөө 400 байсан бол энэ жил Санхүү, эдийн засгийн дээд сургууль бүх мэргэжлээр элсэгчдийн босго оноог 620, Удирдлагын академи 600, МУИС 560 оноо байхаар зааж өгсөн байна. Түүнчлэн СЭЗДС-ийн Сингапур, БНСУ-д сурдаг давхар мэргэжил эзэмшүүлдэг мэргэжилд англи хэлний оноо 750-иас доошгүй байхаар журамласан байна. Харин бусад сургуулиудын босго оноо өмнөх жилийнхтэй ижил гэнэ.
Д.Жаргалсүрэн
