Хятадын зураач, барималч, ардчилсан үзэлт Ай Вэй Вэйн хамгийн алдартай бүтээл болох наранцэцгийн шаазан үрнүүдийг Английн “Тате” галерей худалдаж авлаа. Ямар үнээр гэдгээ тэд нууцалж байна.

2010 онд Ай Вэй Вэй 100 сая ширхэг ийм үрийг Лондонд авчран “Тате” галерейн танхимын 1000 ам.метр талбайг битүү бүрхэн, үзэгчдийг шаазан үрэн дээр хэвтэх, суухыг зөвшөөрч байсан юм. Харин эдгээр үрээс найман сая ширхэгийг л галерей худалдан авчээ. Өнгөрсөн жил Софибигийн дуудлага худалдаан дээр Ай Вэй Вэйн шаазан үрнүүдээс 100 кг-ийг 350 мянган паундаар худалдсан.

Наранцэцгийн шаазан үр найрамдал, нөхөрлөл хийгээд хувь хүний оршихуйн тухай асуултыг дэвшүүлсэн хэмээн мэргэжилтнүүд үздэг. Мөн Хятадын удирдагч Мао бол нар, харин Хятадын ард түмэн наранд тэмүүлэн ургах наран цэцэг хэмээх тайлбар ч бий. Өдгөө 54 настай Ай Вэй Вэй Бээжингийн олимпийн “Шувууны үүр” цэнгэлдэх хүрээлэнг бүтээлцсэн гэдгээрээ дэлхий дахинаа алдартай. Тэрбээр ардчилсан үзлийнхээ улмаас өнгөрсөн онд Бээжин хотноо гурван сар хэртэй хоригдсон бөгөөд одоо Бээжингээс гарч явж болохгүй, хэвлэлийнхэнтэй уулзахгүй хэмээсэн хорион дор амьдарч байгаа билээ.