2008 оны долдугаар сарын 1-ний үймээн ий үеэр  буудуулж амь  насаа алдсан дөрвөн хүний нэг талийгаач Э.Доржсүрэнгийн аав Ц.Энхбаяр уг хэргийн хохирогчоор тогтоогдсон. Тэрбээр Сүхбаатар дүүргийн шүүгч Ч.Хосбаярт хандан хүсэлт гаргажээ. Тэрбээр шүүхэд долдугаар сарын 1-ний хэрэгтэй холбоотой нууц материал ирсэн эсэх, ирсэн бол  танилцах талаар хүсэлтдээ дурдсан байна. Хохирогч Ц.Энхбаяр шүүх хурлын оролцогчийн хувьд  нууц материал байгаа бол  нийтэд ил болгож, нууцын зэрэглэлээс хасах ёстой гэж үзэж  байгаа аж.

Үндэсний аюулгүй байдлын  зөвлөл дээр яригдсан зүйлүүд нь төрийн нууцад хамаарах учир энэхүү хуралдааныг нээлттэй явуулах боломжгүй гэх тайлбарыг шүүхээс өгсөн. Энэхүү асуудалд  МАХН-ын дарга Н.Энхбаяр   “Хэрэв уг хэргийг шийдвэрлэхэд миний бие байлцах хэрэгтэй бол дуртайяа оролцоно. Гэхдээ өнөөдрийн байдлаар шүүхээс намайг гэрчээр оролцох тухай санал ирээгүй байна. Шүүх хурал нь хэлбэр төдий бус, нухацтай, үнэнийг илрүүлэх хурал болоосой гэж бодож байна. Энэ хурал нээлттэй болох ёстой. Телевизүүд шүүх хурлыг шууд дамжуулж, бүх сэтгүүлчид, ард түмэнд нээлттэй болох ёстой. Шүүх хурлын үеэр Монгол Улсын нууцын зэрэглэлд хамаарах зүйл яригдана гэх үндэслэлээр хаалттай зарлаж байгаа. Үнэн хэрэгтээ энд нууц гээд байх зүйл байхгүй. Анх Э.Бат-Үүл гишүүн энэ хэргийг нууц гэж УИХ-д оруулснаас болоод ийм байдалд хүрээд байгаа юм” гэх хариулт өгсөн юм.