Монголын эдийн засгийн чуулга уулзалт гурав дахь жилдээ Монгол Улсын Ерөнхий сайдын ивээл дор Улаанбаатар хотноо зохион байгуулагдаж байна. Тус чуулга уулзалтад гадаад, дотоодын 1000 гаруй төлөөлөгч оролцож байгаа юм. Түүгээр Монгол Улсын эдийн засгийн өсөлтийг хангахад бизнесийн байгууллагууд ямар үүрэгтэй ажиллах талаар онцлон хэлэлцэж байна.

Гэхдээ хуралдааны эхний үйл явцын талаар Монгол Улсын Ерөнхий сайд С.Батболд сэтгүүлчдэд мэдээлэл хийлээ. Энэ үеэр гүйцэтгэх засаглалын тэргүүн гурван зүйлийг чухалчлан үзэж бодит ажил болгохоо мэдэгдлээ. Нэгдүгээрт, үндэсний хөрөнгийн бирж дээр хувьцааг гаргах ажлыг бодит болгох. Хоёрдугаарт, хөрөнгө оруулалтад ялгавартай хандана. Ялангуяа ажлын байр нэмэгдүүлж байгаа жижиг, дунд бизнес эрхлэгчдэд татварын хөнгөлөлт үзүүлэх бодлогыг Засгийн газар барьж ажиллах болно гэж мэдэгдсэн юм. Гурав дахь нь мэдлэгт суурилсан эдийн засаг, инновацийг дэмжихэд анхаарна гэж хэлж байна.