Талбайн теннисний ATP ангиллын тэмцээн Арабын нэгдсэн Эмиратын Дубай хотноо  энэ сарын 27-нд эхэлсэн билээ. “Dubai Duty Free Tennis Championships” тэмцээн нэг сая 700 мянган ам.долларын шагналын сантай бөгөөд түрүүлсэн тамирчин 400 мянган ам.доллар хүртэж, чансааны 500 оноо авах ажээ.

Тэмцээнд дэлхийн топ 10 тамирчны найм нь оролцож байгаа ба 1/8-д шилдэг наймаас долоо нь шалгараад байсан билээ. Өчигдөр болсон 1/8-ээс хагас шигшээд тоглох теннисчдийн нэрс тодорлоо.

1/8-д Сербийн Новак Жокович (1) нутаг нэгт Янко Типсаревичийг (9) 6:1, 7:6-аар, Их Британийн тэргүүн теннисчин Энди Муррей (4) Чехийн Томаш Бердыхыг (7) 6:3, 7:5-аар, Аргентиний Хуан Мартин Дел Потро (10) Францын Жо Уилфред Цонгаг (6) 7:6, 6:2-аар буулган авлаа.

Харин сүүлийн эрхийг Швейцарийн Рожер Федерер (3) ОХУ-ын теннисчин Михаил Южныйг (34) 6:3, 6:4-өөр буулган авлаа. ОХУ-ын теннисчин Михаил Южный (34) хувьд 1/16-д  АНУ-ын тэргүүн теннисчин, дэлхийн чансааны наймдугаарт эрэмбэлэгдэж буй Мерди Фишийг буулгаж авсан билээ.

Ийнхүү дэлхийн шилдэгүүд өрсөлдөж буй тус тэмцээний хагас шигшээ тоглолтод дэлхийн тэргүүн теннисчин Сербийн Новак Жокович Их Британийн тэргүүн теннисчин Энди Муррейтай (4), Швейцарийн Рожер Федерер (3)  Аргентиний Хуан Мартин Дел Потротой (10) учраа таарлаа.

"Их дуулга"-ын 16 түрүүт Швейцарийн Рожер Федерер (3) тус тэмцээнд дөрвөн удаа түрүүлсэн бол "Их дуулга"-ын таван түрүүт Сербийн Новак Жокович (1) гурван удаа түрүүлж байсан байна. Новак Жоковичийн хувьд энэ оны анхны "Их дуулга" болох "Австралийн нээлттэй тэмцээн"-д түрүүлээд байгаа бөгөөд өнгөрсөн жил тэрбээр "Их дуулга"-ын дөрвөн тэмцээний гурвынхан түрүүг авсан хосгүй амжилтын нэгэн болоод байгаа билээ. Энэхүү амжилтыг Рожер Федерер болон Рафэль Надаль үзүүлж байсан юм.

Хагас шигшээ тоглолт өнөө шөнө болно. 

Тус тэмцээний шагналын санг танилцуулбал:

• 1/8-д шалгарахад 42 мянган ам.доллар, чансааны 90 оноо
• Хагас шигшээд шалгарахад 87 мянган ам.доллар, чансааны 180 оноо 
• Шигшээд шалгарахад 184 мянган ам.доллар, чансааны 300 оноо 
• Аваргаар шалгарахад 409 мянган ам.доллар, чансааны 500 оноо хүртэх ажээ.

Мөн эрэгтэй хосын төрөлд түрүүлсэн тамирчид 120 мянган ам.доллар хүртэж, чансааны 500 оноо хүртэх аж.

Газрын тосны хаант улс гэгддэг Арабын нэгдсэн Эмиратын талаар нэмэлт мэдээлэл хүргэхэд “Форбс” сэтгүүлээс гаргасан дэлхийн баян улсуудын жагсаалтын зургадугаарт орохдоо тус улсын иргэдийн жилийн дундаж орлого нь 47 мянган ам.долларын үзүүлэлттэй гарсан байна. Тус жагсаалтыг Персийн булангийн орон Катар улс тэргүүлсэн байна.