Монголын жүдо бөхийн үндэсний шигшээ багийн тамирчид өнгөрсөн сард буурал Европыг дайлаар мордож, Парисын “Их дуулга”, Дюссельдорфын Гранпри, Унгар, Австри, Чех, Польшийн Дэлхийн цомын тэмцээнд хүч үзээд лхагва гаригт эх орондоо ирсэн билээ. Тэгвэл манай шигшээ багийнхантай хамтарсан бэлтгэл хийхээр Францын эрэгтэй жүдочид Улаанбаатарт хөл тавилаа. Францын шигшээ багийн бүрэлдэхүүнд дэлхийн таван удаагийн аварга, хүнд жингийн өнөө цагийн босоо аварга Тедди Ринье (+100 кг-ын жинд барилддаг), ДАШТ-ий хүрэл медальт, залуучуудын дэлхийн аварга Уго Легран (73 кг), 2010 оны ДАШТ-ий хүрэл медальт Тьерри Фабре (-100 кг), Парисын “Их дуулга”-ын алт, мөнгө, хүрэл медальт Давид Ларосе (66 кг), Бээжингийн олимпийн тавдугаар байрын шагналт, Дэлхийн цомын гурван түрүүтэй Дмитрий Драгин (66 кг), Гранпри болон Дэлхийн цомын аварга Алан Шмитт (81 кг), “Универсиад” наадам болон залуучуудын дэлхийн аварга, Сирил Марет (-100 кг), Дэлхийн цомын аварга Гиллес Бонхомме (73 кг) нарын тэргүүтэй 12 жүдоч иржээ. Өмнө нь манай оронд ийм хүчтэй бүрэлдэхүүнтэй баг ирж хамтарсан бэлтгэл хийж байсан түүх үгүй. Энэ үеэр Монголын жүдо бөхийн шигшээ багийн ахлах дасгалжуулагч, гавьяат тамирчин, ардын багш О.Балжиннямтай цөөн хором ярилцлаа.

-Монголын жүдо бөхийн шигшээ багийн тамирчид өнгөрсөн сард Европын цув­рал тэмцээнд оролцоод ир­лээ. Энэ талаар ярихгүй юу?

-Бид бүтэн сарын хугацаанд жүдо бөхийн Европын цуврал тэмцээн зодоглоод өчигдөр (уржигдар) эх орондоо ирлээ. Эхлээд Парисын “Их дуулга”, дараа нь Австри, Унгарын Дэлхийн цом, Дюссельдорфын Гранпри, хамгийн сүүлд Польш, Чех улсад болсон Дэлхийн цомын тэмцээнд оролцож, нийт хоёр алт, зургаан мөнгө, 10 хүрэл медаль хүртсэнээс гадна есөн удаа шагналт байрт орсон.

-Францын эрэгтэй жүдочид манай оронд хамтарсан бэлт­гэл хийхээр ирлээ. Манай тал хүсэлтээ хэзээ тавьсан юм бэ?

-Дэлхийн таван удаагийн аварга Тедди Ринер тэргүүтэй Францын эрэгтэйчүүдийн шиг­шээ баг нийт 12 тамирчин, дөрвөн дасгалжуулагчийн бү­рэл­дэхүүнтэй манай оронд хөл тавилаа. Ер нь Монголын жүдо бөхийн холбоо Францын жүдо бөхийн холбоонд эртнээс олон удаа хүсэлт тавьсан. Ялангуяа өнгөрсөн жил Парист болсон ДАШТ-ий үеэр хамтарсан бэлт­гэл хийх талаар нааштай хариу сонссон. Тэгээд сая Европын цуврал тэмцээний дараа Фран­цын эрэгтэй жүдочид манайд хамтарсан бэлтгэл хийх болс­ноо албан ёсоор мэдэгдсэн. Үүнд МЖБХ-ны ерөнхийлөгч Х.Баттулга, гүйцэтгэх захирал М.Бөхбат нар маш сайн ажилласныг талархах хэрэгтэй байх.

-Францын шигшээ баг хүчтэй бүрэлдэхүүнээ Монголд илгээжээ. Хамтарсан бэлтгэ­лийн үр дүн ямар байх бол?

-Тийм ээ. Энд ирсэн тамир­чид бүгд олимп, тив, ДАШТ-д зодоглосон, хүчтэй бүрэлдэ­хүүн­тэй баг ирлээ. Ялангуяа жүдогийн одоо цагийн хамгийн шилдэг бөх Тедди Ринер Монголд ирсэн нь тун олзуурхууштай. Манай шигшээ багийн тамирчдад энэ хамтарсан бэлтгэл үр дүнгээ өгнө гэж бодож байгаа.

-Цаашид ямар орны багтай хамтарсан бэлтгэл хийхээр төлөвлөж байна вэ?

-Бид олимпийн өмнө Япон, БНСУ-ын шигшээ багтай хам­тарсан бэлтгэл хийхээр төлөв­лөж, хүсэлт гаргаад байгаа. Энэ нь нааштайгаар шийдэгдэх байх.

-Одоогоор манайхан хэдэн жинд эрх аваад байна вэ?

-Эрэгтэйчүүдийн 60, 66, 73, -100, эмэгтэйчүүдийн 48, 52, 63, -78 кг-ын жинд эрхээ бараг авчихсан. Ирэх дөрөвдүгээр сарын 26-29-нд Узбекистаны Ташкентэд Азийн аварга шал­гаруулах тэмцээнтэй. Үү­ний дараа олимпод оролцох жүдоч­дын нэрийг Олон улсын жүдо бөхийн холбоо (IJF) зарлана. Бид тивийн аваргаас хоёроос гурван жинд эрх нэмж авах төлөвлөгөөтэй байгаа.

-Тивийн аваргад оролцох жүдочдыг хэрхэн сонгох вэ?

-Яг тодорхой шийдвэр га­раа­гүй байгаа. Үүнээс өмнө МЖБХ-ны Удирдах зөвлөл болон дасгалжуулагчдын зөвлөл хуралдаад шийдвэрээ гаргах байх. Ер нь олимпийн эрх авсан жинд Монголын бүх ард түмний спортын XIII Их наадмын аваргуудыг явуулна. Харин бусад жинд олимпийн оноонд ойрхон байгаа тамирчдаа явуулах байх.

-XIII Их наадмын жүдо бөхийн тэмцээн хэзээ болох вэ?

-Энэ сарын 28-29-нд “Буянт-Ухаа” спорт цогцолборт болно.