Эх орончдын баярын өдөр хаврын тэргүүн сарын шинийн 8-ны билэгт сайн өдөр тохиолоо. МАХН-ынхан баяр давхцсан эл өдрийг өөрийн болгох гэж нарыг хүртэл өмчлөх  шахсан. Н.Энхбаяр тэр­гүүтэй нөхөд Тасганы овоон дээрээс “Мандах нарыг харах ёслол”-ыг зохион бай­гуулсан. Ингэснээр эл өд­рөөс эхлэн “МАХН-ын нар” мандаж  МАНАН-г саринаан Мон­гол Улсыг гийгүүлнэ гэж бодож байгаа бололтой бай­сан шүү. Энэ хооронд Ардын намынхан Сүхбаатарын хөшөөнд хүн­дэтгэл үзүүлэв. Энэ бүхэнд хорссон МАХН-ынхан “Ар­дын намынхан өглөөний 11 цагаас эхлээд үдийн 17 цаг хүртэл Сүхбаатарын тал­байд Эх орончдын баярын хүн­дэтгэлийн үйл ажиллагаа явуулах захиалгыг хүчний бай­гууллагынханд өгсөн” гэх. Тиймээс хүчний бай­гуул­ла­гынхан “МАХН-ых­ныг нэв­т­­рүүлэхгүй байх үүднээс тусгай хамгаалалт гаргаж, Сүхбаатарын талбайг нүд цав­­чилгүй манасан” юм байх. Гэтэл эцэст нь МАХН-ынхны хэлсэн үг худал болж тэд ч гэсэн Сүхбаатарын хөшөөнд цэцэг өргөсөн юм. МАХН-ынхны гомдоллох нь ар­га ч үгүй биз, тэд “Нарыг өмчилсөн”. “Амташсан хэрээ 13 дахина” гэдгийн үлгэрээр Сүх­баата­рын талбайг ч өмч­лөхийг хүсэх нь ёс байх. Энэ жил чадаагүй юм чинь тэд Ардын намынхнаас  Сүхбаатарын тал­­­байг чөлөөлөх гэж дараа жил зүтгэх нь гарцаагүй. Тиймээс энэ бүхэнд бид эрт­нээс бэлтгэлтэй байж дараа жилийн гуравдугаар сарын 1 гэхэд Сүхбаатарын талбай эх хувиас нь ялгагдахаагүйгээр хуулбарлаад тавьчих хэрэгтэй юм шиг ээ. Тэгээд хуулбарыг нь “Шадав нь ч авна уу, Готов нь ч авна уу” хэнд хамаатай юм. Монголын ард түмэнд лав хамаагүй. Хэрэв ингэж чадвал  “Өмч хувьчлал”-ын асуудал дараа жилээс эхлээд нэг мөсөн цэгцрэх байх. Ардын нам болон МАХН-ынхан ч “дүү нар”-таа сайн үлгэр дуурайл үзүүлэгчдээр тодорч магадгүй шүү дээ. Нөгөөтэйгүүр ямарваа нэгэн тэмдэглэлт ой, баяр болоход хөшөө булаацалдаж, хэл амаа билүүдэхгүй  эв найрамдалтай тэмдэглэж хэвших байх гэж найдаж байна.