Сонгууль эхлэхэд дөрөв хүрэхгүй сар үлджээ. Улс төрийн хү­рээнд ч сонирхолтой үйл явдал өрнөх бо­лов. Халаа, сэлгээ ид үргэлжилж байна. Зас­гийн газрын сайд нарыг Ардын намын ги­шүү­дээс бүрдүүлсний дараа Төрийн өмчийн хорооны дарга, Батлан хамгаалах яамны Тө­рийн нарийн бичгийн даргаар хэнийг то­милох вэ гэсэн асуулт гарч ирсэн. Төрийн ал­баны зөвлөлийнхөн ч улсын өмчийг хариуц­даг хариуцлагатай бөгөөд чамгүй эрх мэдэл­тэй Төрийн өмчийн хорооны даргын албан тушаалд хэнийг томилохоо шийдсэн сурагтай. Батлан хамгаалах яамны Төрийн нарийн бичгийн даргад томилох хүний нэр ч тодорхой болсон дуулдана. Тус зөвлөл өн­гөрсөн сарын эхээр дээрх хоёр албан ту­шаалд томилогдох хүсэлтэй хүмүүсийн дунд сонгон шалгаруулалт зарласан. Тэр үед “Шал­гаруулалтын дүн хоёрдугаар сарын 27-28-ны үеэр гарна. Шалгалтыг 27-нд нь авна” гэж мэдээлж байсан билээ. Үүний дагуу Төрийн албаны зөвлөлийн дарга Д.Зүм­бэрэллхамтай өчигдөр холбогдсон юм. Гэсэн ч тэрбээр “Сонгон шалгаруулалт явуулсан. Дүнг мэдээлэх хараахан болоогүй байна. Маргааш /өнөөдөр/ албан тушаалд томилогдох хүмүүсийн нэр тодорхой болно” гэж мэдээллээ. Төрийн албаны зөвлөлийн дарга ийн хариулсан ч зарим эх сурвалж Төрийн өмчийн хорооны даргаар тус хорооны Төр, хувийн хэвшлийн түншлэл, концессын газрын дарга Б.Заяабалыг томилохоор сонгон шалгаруулсан талаар мэдээлж байна. Нэг ёсондоо олны таамаглал биеллээ олж байгаа бололтой. Тэрбээр УИХ-ын гишүүн З.Энхболд, Д.Зоригт, Монголбанкны ерөнхийлөгч Л.Пүрэвдорж, УИХ-ын гишүүн асан Д.Сугар нарын олон танигдсан эрхмүүдийн хийж байсан Төрийн өмчийн хорооны дарга хэмээх албан тушаалыг хаших нь.  Түүнийг Засгийн газрын Хэрэг эрхлэх газрын дарга Ч.Хүрэлбаатарын хүн гэх хүмүүс ч байгаа билээ. Түүнчлэн Ерөнхий сайд С.Батболд Энэтхэг улсад Элчин сайдаар ажиллаж байсан В.Энхболдыг уг албан тушаалд зүтгүүлсэн ч татгалзсан гэсэн мэдээлэл байна.

Харин Батлан хамгаалах яамны Тө­рийн нарийн бичгийн даргад дөрвөн хүн өр­сөлд­сөнөөс Зэвсэгт хүчний жанжин штабын дарга асан, дэслэгч, генерал Ц.Тогоог томилохоор сон­госон сурагтай. Түүнтэй Зэвсэгт хүчний жанжин штабын газрын дарга асан, хошууч генерал Я.Чойжамц, Батлан хамгаалах яам­ны Төрийн захиргаа, удирдлагын газрын дарга асан, хурандаа Г.Сайханбаяр, тус яам­ны Гадаад хамтын ажиллагааны газрын ах­лах мэргэжилтэн, хурандаа Х.Болдбат нар өрсөлдсөн гэсэн мэдээлэл бий. Гэсэн ч Ц.Тогоо генерал Ардын намын нөлөө бүхий эрх­мүүдийн нэг, цэргийн албанаас тийм ч амар чөлөө­лөгдөх хүн биш гэдгээ батлав бололтой.

Төрийн албанд томилогдох хүмүүсийн нэрс ийнхүү тодорхой болж эхэлж байна. Одоо Нийгмийн хамгаалал, хөдөлмөрийн сайд, Гадаад харилцааны яамны Төрийн нарийн бичгийн дарга нарын орыг залгах хүмүүсийн нэрсийг тодруулах л үлдлээ. Төрийн ордон хавиас Нийгмийн хамгаалал, хөдөлмөрийн сайдад УИХ-ын гишүүн Д.Арвин, Д.Оюунхорол нар өрсөлдөнө гэсэн мэдээлэл үе, үе гардаг. Гэхдээ Т.Ганди сайд ажлаа хараахан хүлээлгэж өгөөгүй байна.