Улс төрийн хүрээнд нэгэн нууц мэдээлэл задарчээ. С.Баяр, Э.Бат-Үүл хоёр тойргоо сольсон тухай яриа Ардын нам, Ардчилсан намынхны анхаарлыг татаж байна. Бүр тодруулбал, эрх баригч хүчний гол стратегич Сэлэнгэ аймагт, Эрдэнэ баавайн хүү нийслэлд нэр дэвшихээр шийдсэн сурагтай. Өмнөх сонгуулийн үеэр Монгол Улсын Ерөнхий сайд, МАХН-ын даргын дүрээр Сүхбаатар дүүрэгт гэнэт “зочилсон” С.Баяр энэ удаад Ардын намын лидер, “Атрын III аян”-ы авторын хувиар сэлэнгэчүүдтэй гар барих нь. Харин Сэлэнгийн трак­торчдыг помещикуудын эс­рэг хөдөлгөж байсан Э.Бат-Үүл газ­рын дээрмийн эсрэг гэр хороол­лын­­хонтой хамтран тэмцэхээ ойр, ойрхон мэдэгдэх болсон. “Ирэх сон­гуульд нэр дэвшихгүй” гэсэн тэр­бээр “Э.Бат-Үүл нэр дэвшихгүй бол намын нэр хүндэд халтай ч юм уу. Тэгээд ч намын дарга “Тийм асуудал байхгүй” гээд байна” хэ­мээн эргэлзсэн удаатай. Гэвч Мон­го­лын улс төрийн хоёр гол дүр юуны учир харилцан нүүдэл хийх болов. Ардын намын далд удирдагч С.Баярын хувьд асуудал их. Ерөнхий сайд, МАХН-ын даргын нэр, сүрээр 2008 онд Сүхбаатар дүүрэгт ялалт байгуулсан түүний хувьд цаг өөр болсон. Ц.Мөнх-Оргилыг Баянгол дүүрэгт торгуулийн сумангийн цэрэг болгон илгээх нь түүнд амархан байсан бол энэ удаад нийслэлд нэр дэвших нь нэн хэцүү болсон биз. Учир нь экс Ерөнхийлөгч Н.Энх­баяртай эе эвдрэлцсэн түүх, долоо­дугаар сарын 1-ний үймээн, хам­тарсан Засгийн газартай хол­боо­той хар бараан мэдээллүүд өр­сөл­дөгчдийнх нь барих гол зэвсэг байх нь тодорхой.

С.Баярын орон гарч мэдэх Сүхбаатар дүүрэг бол “Ерөнхий сайд”-ын тойрог. УИХ-ын 2008 оны сонгуулийн үеэр тус дүүргийнхэн Ерөнхий сайд С.Баярыг угтан авч, УИХ-ын гишүүнээр сонгосон. Тэг­вэл тэд УИХ-ын гишүүнээр хоёр удаа сонгосон С.Батболдоо ирэх зун Ерөнхий сайд-нэр дэвшиг­чийн хувиар хүлээн авна. Сонин тохиол­дол биш гэж үү. Гэвч сонгуулийн VIP тойрог болох Сүхбаатар дүүрэг өмнө нь гурван мандаттай байсан бол одоо хоёр мандаттай болсон. Улстөрчдийн нүүдэл ч удтал үр­гэлж­лэх нь. УИХ-ын 2004 оны сонгуулиар Сүхбаатар дүүргийн сон­гогчид Монголын улс төрийн шинэ дүр төрхийг тодор­хойлсон би­лээ. Өрнө, дорнод боловсрол эзэмш­сэн залуусыг тэд төрд илгээсэн нь С.Батболд, Ц.Мөнх-Оргил, Л.Ган­төмөр нар байв. Мэдлэг боловс­рол­той, бизнесийн салбарт ч, спортын талбарт ч одтой тэдний өмнө төр үүдээ цэлийтэл нээж, хамаг л чухал ажлуудаа даалгах болсон юм. Гэвч УИХ-ын 2008 оны сонгуулийн үр дүн С.Батболд, Ц.Мөнх-Оргил нарт хоёр өөр хувь тавиланг “бэлэг­лэсэн”. С.Батболдын тухайд намын дарга, Ерөнхий сайдын тамгыг С.Бая­раас хүлээн авч, Монгол төрийн гурван өндөрлөгийн нэг болсон бол Ц.Мөнх-Оргил долоодугаар сарын 1-ний хэрэг явдлаас хойш томилгоо, тохиролцооны том тойргоос ха­сагдсан гэхэд болно. Харин одоо Ардын намын дарга, Ерөнхий сайд С.Батболдтой хэн гэгч эрхэм нэг баг болон нэр дэвших нь таавар мэт байна. Зарим улстөрч “Сангийн дэд сайд Ч.Ганхуяг, “Урбанек”-ийн Б.Лхагважав хоёрын нэг нь Сүхбаатар дүүрэгт нэр дэвших байх” хэмээн таамаглаж байгаа ч үүнд эргэлзэх хүн олон. 

Ардчилсан намаас Сүхбаатар дүү­рэгт нэр дэвших эрхмүүд бараг тодорхой болов. УИХ-ын 2008 оны сонгуулиар Ерөнхийлөгчийн Тамгын газрын дарга Д.Баттулга, УИХ-ын гишүүн Л.Гантөмөр, Нийг­мийн хамгаалал, хөдөлмөрийн дэд сайд асан Д.Нямхүү нар энэ той­рогт нэр дэвшсэн билээ. Том оврын жийпнүүдийг хязгаарлах ту­хай санаачилга гаргаж, тэр жилийн хавар олны анхаарлыг өөртөө татсан Л.Гантөмөрт сонгогчид дахин итгэл хүлээлгэсэн нь 2008 он. Харин нөгөө хоёрынх нь хувьд, С.Баяр, С.Батболд нарыг ялна гэдэг тийм ч амаргүй байсан нь тодорхой. Үнэхээр ч “Хаширсан хүн гэж хаширсан хүнийг л хэлнэ” гэдэгчлэн Д.Нямхүү энэ удаад тойргоо сольж, Увс нутгийн зүг хүлгийн жолоо залахаар болжээ. Д.Баттулгад даагаа нэхэх хүсэл бий ч Ерөнхийлөгч Ц.Элбэгдорж түүнд “Нэр дэвшилгүй өнжчих. Миний дэргэд ажилла” гэж хэлсэн гэдэг. Тиймээс Ардчилсан намын удирдлагууд Сүхбаатар дүүрэгт дахин хуваарилалт хийж, УИХ-ын гишүүн Р.Амаржаргалыг нэр дэвшүүлэхээр шийдсэн су­раг­тай. Эрхэм гишүүний хувьд, Ховд аймгаас 2008 онд сонгогдсон ч той­рогтоо нэр хүнд тааруухан байгаа аж. Гэхдээ МҮДН фракци дахин сэргэж буйг намын нөхдөдөө саяхан мэдэгдсэн Р.Амаржаргалд онцлох нэгэн тодотгол бий. Ардчилсан холбоо эвсэл УИХ-д олонхи байх үед тэрбээр Монгол Улсын Ерөнхий сайдаар ажиллаж байсан юм. Тэгэхээр Ерөнхий сайд С.Батболдтой Ерөнхий сайд асан Р.Амаржаргал Сүхбаатар дүүрэгт өрсөлдөж таа­рах нь ээ. Л.Гантөмөр бол той­рогтоо дархлагдсан нэгэн. “Ард түмний мөнгийг хэмнэе”, “Цаасан мэндчилгээг цахим мэндчилгээгээр сольё” хэмээн уриалж яваа түүний IQ-г Төрийн тэргүүн үнэлсэн удаа­тай. Ерөнхийлөгч Ц.Элбэгдорж “Төрийн тэргүүнд 41 эрх, хоёр үүрэг, УИХ-ын удирдлага, гишүүдэд 281 эрх, 14 үүрэг, Ерөнхий сайдад 67 эрх, Засгийн газрын гишүүн, агентлагийн дарга нарт 1721 эрх, 264 үүрэг ногджээ. Төрийн нэг эрх мэдэлтэн дунджаар долоон эрх эдэлж, нэг үүрэг хүлээж байхад иргэнийг нэг эрх дагаж долоон үүрэг дарж байна. Төрийн эрх долоодугаар сарын 1 шиг, иргэний эрх нэгдүгээр сарын 7 шиг харагдаж байна” хэмээн УИХ-ын хүндэтгэлийн чуулганы үеэр тавьсан илтгэлдээ Л.Гантөмөрийн хийсэн гаргалгааг иш татсан нь том PR болсон. Ямартай ч нам өөр ч нэг тойргоос сонгогдсон С.Батболд, Л.Ган­төмөр нар ирэх сонгуулиар “Ард түмний хөгжлийн хөтөлбөрийг хэрэгжүүлэх, ард түмний мөнгийг хэмнэхийн аль нь илүү үр дүнтэй вэ” хэмээн мэтгэлцэнэ. УИХ дахь Ард­чилсан намын бүлгийн дэд дар­га Л.Гантөмөр С.Батболдын тан­химын зарим гишүүн болон Ардын намынхны эсрэг хатуухан үгс чу­луу­дах нь ч улам олшров. Аргагүй шүү дээ. Сонгууль эхлэх дөхлөө. Харин Э.Бат-Үүл гишүүн Сэлэнгийн трак­торчдоо орхиод нийслэлийн аль той­рогт нэр дэвших бол. “Олны үг ор­той” гэдэгчлэн дээрх яриа үнэн бол цөс ихт буриад эр маань С.Баярт ашиг­тай тохиролцоо хийчихэв үү, яав.