Засгийн газар Монголын үйлдвэрчний эвлэлтэй гэрээ байгуулж, багш нарын цалинг энэ сарын 1-нээс нэмэхээр болсон. Гэвч цалинг одоо болтол нэмээгүй байгаа. Тиймээс багш нар дахин ажил хаялт зарпах тухай яригдаж байгаа. Гэтэл Ерөнхий боловсролын сургуулийн сурагчдийн амралт энэ сард эхэлнэ. Үүнд багш нарын ажил хаялт нөлөөлөх талаар БСШУЯ-ны Ерөнхий боловсролын хөгжлийн төлөвлөлт, хөтөлбөр, төслийн бодлого, зохицуулалт хариуцсан ахлах мэргэжилтэн Р.Балжиннямаас тодрууллаа.

-Ерөнхий боловсролын сургуулийн сурагчдын амралт хэзээ эхлэх вэ?

-Ерөнхий боловсролын сурагчдын гуравдугаар улирлын амралт энэ сард эхэлнэ. Тодруулбал, энэ сарын 22-ноос эхлэх юм. Энэ улирлын амралтаар ерөнхий боловсролын сургуулийн бүх ангийн сурагчид 14 хоног амарна.

-Бага, дунд, ахлах ангийн сурагчид бүгд адилхан 14 хоног амрах уу?

-Гуравдугаар улирлын амралт болохоор бүх сурагчид 14 хоног амарна. Өөрөөр хэлбэл, Ерөнхий боловсролын 12 жилийн сургуулийн I-II ангийн сурагчид III, VIII ангийн сурагчид 11 жилийн сургалттай IV-XI ангийн сурагчид бүгд ижилхэн амарна. Тэгээд сурагчдын хичээл ирэх сарын 5-нд орно.

-Өмнө нь багш нар долоо хоногийн ажил хаялт зарлаж байсан. Гэтэл одоо бас дахин ажил хаялт зарлах тухай яригдаж байна. Хэрвээ багш нар ажил хаявал сурагчдын амралтад өөрчлөлт орох уу?

-Үгүй. Багш нар ажил хаясан ч сурагчдын амралт хуваарийн дагуу явагдана. Ямар нэгэн өөрчлөлт орохгүй.