Төмрийн хүдрийн баяжмалын үнэ одоогийн байдлаар дэлхийн зах зээлд нэг тонн нь 135-145 ам.долларын үнэд хэлбэлзэж байна. Гэхдээ энэ жил төмрийн хүдрийн баяжмалын үнэ 110 ам.доллар/тонн болтлоо унаж болзошгүй тухай Хятадын Ган, төмрийн холбооны дэд тэргүүн Wang Xiaoqi мэдэгджээ. Тэрбээр “Өнгөрсөн есдүгээр сараас хойш төмрийн хүдрийн зах зээлд огцом уналт тохиосон нь үүний тод илрэл юм. Хятадын макро эдийн засгийн бодлого, хяналтын арга хэмжээ улам л суларсаар байгаа нь уг түүхий эдийн үнэ цаашид унахад нөлөөлж мэднэ” гэж тайлбарлажээ.

Өнгөрсөн оны эхний хагаст төмрийн хүдрийн үнэ нэг тонн 180 ам.долларт хүрээд байсан бол аравдугаар сараас эхлэн 120 ам.доллар болтлоо унасан юм.
Нөгөөтэйгүүр Хятадын дотоодын компаниудын гадаад улс орон дахь төмрийн хүдрийн ордуудын тоо нэмэгдсээр байгаа ажээ. Өнгөрсөн онд Хятадын компаниудын гадаад орнууд дахь төмрийн хүдрийн олборлолт 150 сая тоннд хүрсэн нь энэ жил 30 сая тонноор нэмэгдэх хандлагатай байгааг тус холбоо мэдээлжээ. 

Хятадын хувьд төмрийн хүдрийн импортын хэмжээ 2011 онд 68 хувиар өсч 686 сая тонн байсан бол дотоодын олборлолт 27.2 хувиар өсч 283 сая тоннд хүрчээ.
Тус улсын Ган, төмрийн холбооны тооцож буйгаар, энэ жил Хятадын төмрийн хүдрийн эрэлт 1,182 тэрбум тоннд хүрэхээр байна.  

Б.Төгс

www.mongolianminingjournal.com
www.journalism.mn