Боксын ширүүн тэмцлээр эхэлсэн Монголын бүх ард түмний спортын XIII их наадмын цана, тэшүүрийн тэмцээн сар шинийн өмнөхөн өндөрлөсөн. Их наадмын дөрөвдэх төрөл-ширээний теннисний тэмцээн маргааш (02.03) нийслэл хотноо “Оч” клубт эхлэх гэж байна. Гуравдугаар сарын 2-4-нд явагдах уг тэмцээнд зургаан бүсээс шалгарсан 102 тамирчин эрэгтэй, эмэгтэй баг, эрэгтэй, эмэгтэй нэг бүрчилсэн, эрэгтэй, эмэгтэй хос болон холимог хос гэсэн долоон төрлөөр хурд хүчээ сорино.

Мөн ширээний теннисний Азийн аварга шалгаруулах тэмцээн энэ өдрүүдэд Макаод явагдаж байна. Тэмцээнд манай шилдгүүд эх орноо төлөөлөн оролцсоноос М.Дэлгэрмаа эмэгтэйчүүдийн ганцаарчилсан төрөлд хоёр ялж 1/16-д Сингапурын тамирчин, дэлхийн аварга Ли Жиавэйд дийлджээ. Хэдхэн хоногийн өмнө БАТ-ий наадмын Улаанбаатарын бүсийн тэмцээнд түрүүлсэн, 15 настай тамирчны хувьд энэ нь том амжилт хэмээн ширээний тенниснийхэн үнэлж байгаа юм.