МАХН, МҮАН ойн арга хэмжээ зохион байгуулна

Хуучирсан мэдээ: 2012.02.29-нд нийтлэгдсэн

МАХН, МҮАН ойн арга хэмжээ зохион байгуулна

МАХН-ын дарга Н.Энхбаяр өнөөдөр мэдээлэл хийж, МАХН, МҮАН-ынхан “Эх орон-Тусгаар тогтнол-Шударга ёс үндэсний эв нэгдлийн хөдөлгөөн” улс төрийн хүчин байгуулсны нэг жилийн ойгоо маргааш буюу Эх орончдын өдөр тэмдэглэх гэж буй тухай дуулгалаа.  Хуралд МАХН-ын дарга Н.Энхбаяр, МҮАН-ын гишүүн Ц.Цолмон, Н.Батцэрэг, МАХН-ын Ерөнхий нарийн бичгийн дарга Н.Удвал, Миний Монголын газар шороо хөдөлгөөний тэргүүн П.Болд болон намын бусад гишүүд оролцов. Энэ үеэр маргааш зохион байгуулах арга хэмжээ болон ирэх жил хийх үйл ажиллагааны талаар тайлагнасан юм. Нэн түрүүнд “Эх орон-Тусгаар тогтнол-Шударга ёс үндэсний эв нэгдлийн хөдөлгөөн” ирэх дөрөвдүгээр сард Ард түмний их хуралдай хийхээр төлөвлөөд байгаа ажээ. Харин өнөөдөр МАХН, МҮАН-ын гишүүд Худалдаа, аж үйлдвэрийн тэнхимд дугуй ширээний уулзалт хийх ажээ. Түүнчлэн маргааш өглөө 07.00 цагт Тасганы овоонд “МАНАН-гүй Монголын төлөө” уриатай шинийн наймны ургах нарыг харах ёслол зохион байгуулах гэнэ. Үргэлжлүүлээд, 10.30 цагт Их жанжин Сүхбаатарын хөшөөнд цэцэг өргөж, Чингисийн хөшөөнд хүндэтгэл үзүүлэх бөгөөд 11.00 цагт Сүхбаатарын талбайд “Монголоо аврах хандив”-ын аян өрнүүлж, урлагийн тоглолт хийх ажээ. Мөн хийдүүдэд Монголын ард түмэнд зориулан ном хуруулах юм байна. Эцэст нь оройн 20.00 цагт Тасганы овоонд гэрэлт зул хөөргөх ёслол хийх гэнэ.

Мэдээлэл хийх үеэрээ МАХН-ын дарга Н.Энхбаяр “Энэ өдөр бол баярлаж, амарч өнгөрөөх өдөр биш өнгөрсөн түүхээсээ сургамж авах, ирээдүйд юу хийхээ бодох өдөр байх ёстой” хэмээв. Түүнчлэн “Тухайн оронд тулгамдсан асуудлыг шийдвэрлэхийн тулд улс төрийн хүчин байгуулагддаг. Гэтэл одоо Монголын Ардчилсан нам хоолойд тээглэсэн яс болоод байна. Ядуурлаас илүү тулгамдсан асуудал бол МАНАН байна. Ардчилал бол шинээр сурч, ойлгож байх ёстой ухагдахуун. Ардчиллыг нэг хүн өмчилж авснаар булшилж байна. Тэр хүмүүсээс хоёр сая долоон зуун мянган хүний өмч болсон ардчиллаа салгаж авах цаг ирээд байна” гэсэн юм.

МАХН-ын дарга Н.Энхбаяр УИХ-ын даргаар ажиллаж байхдаа жил бүрийн арванхоёрдугаар сарын нэгнийг Эрх чөлөөний өдөр, харин гуравдугаар сарын нэгнийг Эх орончдын өдөр болгох шийдвэр гаргаж байжээ.

Д.Жаргалсүрэн
NewsMN Гар утасны хувилбар Татах
NEWS.mn

Мэдээллийн эх сурвалж