Монголын боулинг сонирхогчдын холбооноос “Big Bowling” төвтэй хамтран “МТ” группийн дэмжлэгтэйгээр зохион байгуулж буй “Big Bowling Tour-2012” клубын аварга шалгаруулах тэмцээний нэгдүгээр тойргийн хоёр дахь ээлжийн тоглолтууд боллоо. Лигийн системээр үргэлжилж буй тус тэмцээнийг энэ жил хоёр дахь жилдээ зохион байгуулж байгаа юм.

Тэмцээнд 10 клубын 50 тамирчин өрсөлдөж байна. Шинээр “МТ” групп, “Евро-Ази” дээд сургуулийн дэргэдэх клубууд, мөн Монголын хэлгүй, дүлийн иргэдийн нийгэмлэгийн дэргэдэх “Blue Bag” клубын тамирчид тэмцээнд оролцож буй.

Тэмцээний нэгдүгээр тойргийн эхний тоглолт өнгөрсөн нэгдүгээр сарын 15-нд болж, багууд тус бүр гурван тоглолт хийсэн юм. Харин хоёрдугаар ээлжийн тоглолт хоёрдугаар сарын 19-нд болж, багууд дөрвөн тоглолт хийлээ. Тэмцээнийг тэргүүлж байсан хоёр баг энэ өдөр хоёулаа ялагдал хүлээсэн. “Евро-Ази” клубын тамирчид тэмцээний ерөнхий ивээн тэтгэгч “Магнай Трейд” компанийн хоёрдугаар багт хожигдсон бол “МТ”-ийн нэгдүгээр баг өнгөрсөн жилийн аварга “Big Bowling” клубын нэгдүгээр багт, дараа нь хоёрдугаар багт хожигдож, дараалсан хоёр ялагдал хүлээжээ.

Лигийн тэмцээний эхний тойргийн хоёрдугаар ээлжийн тоглолтын дараах байдлаар “Big Bowling” клубын нэг ба хоёрдугаар баг, мөн “Евро-Ази” клубын тамирчид ижил 13 оноотой тэмцээнийг тэргүүлж байна.