Бүсгүй хүний өр нинжин сэтгэл, мяндсан ухаан, бүүвэйн дуу энэ ертөнцийг аргадаж ирсэн. Домогт Ану хатан, суут Сэцэн Мандухайгаас авахуулаад харьшгүй зориг, хатан ухаантай Монгол эмэгтэйчүүд эр нөхөр, эх орондоо түшиг болж ирснийг түүх өгүүлдэг. Тэгвэл тэд 21-р зуунд нийгмийн бүх салбарт манлайлж, хөгжлийн түүчээ болж байна. Чухам тэдгээр агуу удирдагч бүсгүйчүүдийг олон нийтийн санал асуулгаар шалгаруулах “Grand Lady” ёслолын ажиллагааг “Гранд” сэтгүүл өнгөрсөн оны 3-р сарын 11-нд зохион байгуулж, 5 эмэгтэйг “Гранд лэди”-гээр зарлаж байсан. НХХ-ийн сайд Т.Ганди, Хүүхэлдэйн театрын захирал, яруу найрагч Ц.Хулан, “АПУ”-гийн П.Батчимэг, MTS группийн захирал Х.Жавхлан, ДАШТ-ний хүрэл медальт, гавьяат тамирчин, жүдоч М.Бундмаа нарын хүчирхэг бүсгүйчүүд өнгөрсөн оны шилдгүүдээр шалгарч байсан билээ. Оны шилдэг лидер эмэгтэйг хамгийн шударга, ардчилсан зарчмаар шалгаруулдаг Урлаг, Спорт, Улс төр, Бизнес, Нийгэм соёл, Хүмүүнлэг гэсэн 6 салбар тус бүрд 4-5, нийт 28 шилдэг эмэгтэйн нэрийг ёслолын ажиллагааг зохион байгуулах комисс нэр дэвшүүлсэн бөгөөд шалгаруулалтыг уламжлалт ёсоороо онлайн хэлбэрээр явуулах ажээ. Та дэмжиж буй эмэгтэйдээ санал өгөхийн тулд www.grandnews.mn цахим хаягаар орж саналаа өгөх бөгөөд санал асуулга өнөөдрөөс эхлэн 3-р сарын 9-нийг хүртэл үргэлжлэх юм байна.