Боловсрол, шинжлэх ухааны үйлдвэрчний эвлэлийн холбооны багш нарын ажил хаялт зохион байгуулах түр хорооныхон хуралдаж энэ долоо хоногт багтаж дахин ажил хаяхаар болжээ. Учир хөдөлмөр, нийгмийн дэвшлийн гурван талт үндэсний хорооны хурлаар 2012 оны эхний улиралд багтаан цалин хөлсийг хоёр дахин нэмэгдүүлэхээр шийдвэрлэсэн. Гэтэл Засгийн газар, Монголын үйлдвэрний эвлэлийн холбоо, Ажил олгогч эздийн холбоотой зөвшилцсөн шийдвэрээсээ ухарч 2012 оны гуравдугаар сарын нэгнээс 80 мянган төгрөгөөр,  тавдугаар сарын 1-нээс 23 хувиар нэмэгдүүлэх болсныг багш нар эсэргүүцэж байгаа юм байна. Тиймээс багш нар дахин ажил хаяхаар шийдээд байна.

Энэ тухай БШУҮЭ-ийн дарга Ж.Батзоригоос лавлахад “Сүүлд хийсэн нэмэлт хэлэлцээгээр багш нарын цалинг хоёрдугаар сарын 1-нээс нэмнэ гэсэн. Засгийн газартай тохиролцсон тохиролцоог УИХ-ын эрхэм гишүүд биелүүлсэнгүй. Нөгөө талаар хөдөлмөрийн харилцааны онцлогийг ойлгож ухамсарлахгүй байна гэж ойлгож болно.  Хуулиар зохицуулаагүй бусад бүх харилцаа бол гэрээ хэлэлцээрээр зохицуулагдана гэсэн хуулийн зохицуулалт байдаг. Тэгэхээр нэгэнт гэрээ хэлэлцээрээр тохирсон зүйлээ биелүүлэхгүй байгаа болохоор бид тэмцлийн арга хэмжээ авахаас өөр арга үлдсэнгүй” гэсэн юм.

Энэ удаагийн багш нарын ажил хаялт нь өмнөх багш нарын ажил хаялтаас илүү өргөн далайцтай болох гэнэ. Боловсрол, шинжлэх ухааны үйлдвэрчний эвлэлийн холбооны багш нарын ажил хаялт зохион байгуулах түр хорооныхон үдээс хойш БСШУЯ-ны төлөөлөлтэй уулзана.