-"100 мянган айлын орон сууц" хөтөлбөрийн хүрээнд жилийн зургаан хувийн хүүтэй зээл авч орон сууцтай болох журмыг Засгийн газар баталсан. Энэ ажлын хүрээнд Орон сууц санхүүжилтийн корпораци /ОССК/ бэлтгэлээ базаасан уу?

-Бид бэлтгэл ажлаа хийж байна. Орон сууц санхүүжилтийн корпорацийн хувьд хоёр хүсэлтийг хүлээж авах юм. Нэгдүгээрт, анх удаа орон сууц авч байгаа гэсэн лавлагааг иргэд авчрах ёстой. Хоёрдугаарт, "100 мянган айлын орон сууц" хөтөлбөрийн хүрээнд Засгийн газраас орон сууцны жагсаалтыг баталсан. Үүнд батлагдсан барилгын төслүүдээс иргэд орон сууцаа сонгосон байх ёстой юм. Бидний зүгээс энэ хоёр хүсэлтийг иргэдээс хүлээн авч, арилжааны банкуудад хуваарилна. Одоогоор арилжааны 2-3 банк бий. Гэхдээ цаашдаа нэмэгдэх хандлагатай байгаа. Эдгээр банкаар дамжуулан эх үүсвэрийн нөөцтэй нь уялдуулж хуваарилах юм.

-Иргэд арилжааны банкууд руу шууд очиж болохгүй юу?

-Бид банкууд руу шууд явуулъя гэхээр банк өөрсдийнхөө зээлдэгчдэд энэхүү хөнгөлөлттэй зээлийг өгөх хандлага ажиглагдана. Түүнчлэн уг зээлийг зорилтот түвшний бус хүмүүст өгөх магадлал өндөр байгаа. Тиймээс ОССК-д хүсэлтээ ирүүлсэн хүмүүсийн материал банкинд очих байдлаар зохицуулсан юм.

-ОССК-д хүсэлтээ хүргүүлсний дараа иргэдийн материал буцна гэсэн ойлголт байхгүй биз дээ?

-Бид зөвхөн хоёр зүйлийг тодорхойлно. Харин банк өөрсдийнхөө шалгуур болох сарын орлогынхоо 45 хувиар зээлээ төлж чадах уу гэсэн нөхцөлүүдийг тавина. Хэрэв иргэдийн орлого хүрэхгүй бол банк зээлийг олгохгүй байх эрхтэй.

-Иргэдийн хүсэлтийг хэзээнээс хүлээн авах вэ?

-Бид ирэх сарын 10-наас иргэдийн өргөдлийг хүлээж авна. Манай сайт болох www.ossk.mn-ээс дэлгэрэнгүй мэдээлэл авч болно. Харин орон нутгийн иргэд шуудангаар өргөдлөө өгч болох юм. Бид харьяа банкууд руу нь албан тоотоор зээлийн тодорхойлолтыг нь явуулна.

-Зээлийг хэдий хэр хугацаанд шийдвэрлэх вэ?

-Арилжааны банк ажлын 15 хоногийн дотор зээлийг шийдвэрлэнэ.