Нийслэлийн онцгой байдлын газрын шуурхай бүлэг 105 дугаарт өчигдөр зургаан дуудлага иржээ. Үүнд галын хоёр, зөрчлийн гурав, шуурхай нэг дуудлага ирсэн байна. Дуудлагын ихэнх нь орон сууцны дундах овоолсон хог шатах, үүний улмаас ойр орчимд гал тархаж буйтай холбоотой байсан ажээ. Тухайлбал, Сонгинохайрхан дүүрэгт хогийн цэг, Сүхбаатар дүүргийн 15 дугаар хороонд Ус түгээх байрны дээвэр шатсан байна.

Сар шинийн баярын өдрүүдэд нийслэлийн онцгой байдлын газар өндөржүүлсэн бэлэн байдалд ажиллаж байгаа билээ. Энэ дашрамд, НОБГ-аас баярын өдрүүдэд иргэдийг цахилгаантай болгоомжтой харьцахыг анхаарууллаа. Мөн баяраар иргэд согтууруулах ундааг хэтрүүлэн хэрэглэж, биеэ хянах чадваргүй болсны улмаас осгох, цаашлаад амь насаа алдах аюултай тул иргэдийг согтууруулах ундааг зөв зохистой хэрэглэхийг анхааруулж байна.