Гачууртын шар хоолойн аманд энэ жилийн өвлийн анхны уралдаан боллоо. Тус уралдааныг Гачууртын уяачдын холбооны Т.Базарсад, Б.Эрдэнэцогт нарын уяачид зохион байгууллаа. Их насны 40-аад морьд уралдсан уг уралдаанд Багахангайн Л.Оюунбаярын хар түрүүлж, Гачууртын Н.Баярмагнайн шарга аман хүзүүнд, Б.Түвшинбаярын ногоон гуравт, Д.Бат-Эрдэнийн хул морь дөрөвт хурдалж, Н.Батбилэгийн сартай зээрд айргийн тавд хурдаллаа. Дашрамд дуулгахад өнгөрсөн жилийн төрийн их баяр наадмын шинэ монгол адуу буюу эрлийз дааганы уралдаанд “Гацуурт” ХХК-ийн захирал
Лхагваагийн Чинбатын Бүжин хээр даага түрүүлж торгон жолоо өргүүлж байжээ.

Ингээд түрүү морины эзэн Л.Оюунбаярын сэтгэгдэлийг сонслоо.

-Та хаанаас ирж уралдав?

-Би Багахангай дүүргээс ирж оролцлоо. Билгийн тооллын XVII жарны Баясгалан хэмээх усан луу жилийн сар шинийн баярын шинийн хоёрны энэ сайхан билэгт өдөр морьдынхоо тоосыг үзээд сайхан байна.

-Та хэд дэхь жилдээ морь уяж байна.

-Би арваад жил хурдан морь уяж байна.

-Таны сая түрүүлсэн морьдын амжилт?

-Өнгөрсөн жилийн “Гачууртын 50 жил”-н ойд айргийн дөрөвт хурдалсан. Мөн өвлийн уралдаануудад нилээдгүй айрагдаж байсан.

Харин “Дүнжингарав-2012” бүсийн хаврын уралдааны ирэх гуравдугаар сарын 3-нд Төв аймагт болох билээ.