Венесуэлийн ерөнхийлөгч Уго Чавес ирэх долоо хоногийн эхээр Кубад мэс засал хийлгэх болжээ. Венесуэлийн Засгийн газрын хуралдааныг төрийн телевизээр шууд дамжуулах үеэр ноён ерөнхийлөгч “Мэс засал хийхэд шаардлагатай үзлэг, шинжилгээ хийлгэж, бүх бэлтгэлээ хангасан. Тиймээс ирэх даваа, эсвэл мягмар гаригт мэс засал хийлгэнэ” хэмээн мэдэгдсэн байна.

Уго Чавес Венесуэлийн Үндэсний зөвлөлд хандан ерөнхийлөгчийн албаа өгөхгүйгээр хэсэг хугацаанд эх орноо орхиж, эрүүл мэнддээ анхаарах хүсэлт тавьсныг Үндэсний зөвлөл хүлээн авсны дараа дээрх уулзалт болжээ. Өнгөрсөн жил мөн Кубад очиж, мэс засал хийлгэж байсан тэрбээр өнөөдөр Кубыг зорьсон бөгөөд хэдий хугацаанд тэнд байж, эмчилгээ хийлгэх эсэх нь тодорхойгүй гэжээ. Гэхдээ энэ хугацаанд тэрбээр зөвлөхүүдтэйгээ байнгын харилцаатай байж, улсын ажлыг цалгардуулахгүй байх талд анхаарна гэсэн байна. Дашрамд дуулгахад, Венесуэлийн ерөнхийлөгчийн сонгууль долоон сарын дараа болох юм.