“Төсвийн зарцуулалт ба татвар төлөгчдийн хяналт” буюу Монголын эдийн засгийн форумын урьдчилсан хэлэлцүүлэг хоёрдугаар сарын 20-нд Хууль зүйн үндэсний төвд боллоо. Энэ үеэр Төсвийн ил тод байдлын тухай Сангийн яамны Төсвийн бодлогын газрын дарга Н.Мандуул, Төсвийн зарцуулалт ба татвар төлөгчдийн хяналт сэдвээр “Иргэд төсвөө хянана” ТББ-аас илтгэл хэлэлцүүлэн, санал бодлоо солилцсон юм.

Хэлэлцүүлгийн үеэр төсвийн төрийн бүтэц, бодлого, үйл ажиллагаа, тоон мэдээлэл, төлөвлөгөө, төсөөллийн талаарх мэдээлэл нийтэд ойлгомжтой, хүртээмжтэй байх нь төсвийн ил тод байдал гэдгийг онцлон тэмдэглэж байсан. Энэхүү хэлэлцүүлгээс иргэдийн оролцоог сайжруулах, иргэний нийгмийг хөгжүүлэх, төсвийн тухай зөвлөгөөг номын сангаар дамжуулах, номын санг мэдээллийн төв байдлаар хөгжүүлэх, төсвийн хяналтыг сайжруулах санал зөвлөжийн дүгнэлтүүд гарсан. Монгол Улсад Төсвийн тогтвортой байдлын тухай хуулийг 2010 онд баталсан бөгөөд уг хууль нь төсвийн бодлого, стратегийг тодорхойлоход баримтлах төсвийн удирлагын шинэ зарчим, шаардлагад нийцсэн эрх зүйн орчин хэмээн албаныхан тодорхойлж байна. Өөрөөр хэлбэл энэ нь иргэдийнхээ эдийн засгийн тогтвортой, эрсдэл багатай орчинд сэтгэл амар ажиллаж, амьдрахад чухал ач холбогдолтой ажээ.