Монгол Улсын Төрийн шагналт, Соёлын гавьяат зүтгэлтэн, яруу найрагч Д.Төрбат, Г.Сэр-Одын нэрэмжит  шагналт яруу найрагч Т.Зөнбилэг нарын хамтран бүтээсэн "Сүүтэй тангараг" гурван бүлэг таван үзэгдэлт түүхэн дуулалт жүжиг их жанжин Д.Сүхбаатарын мэндэлсэний 119 жилийн ойн өдрөөр Баруун-Урт сумынхны мэлмийг мялааж, оюуныг нь гийгүүлээ.

"Морин хуур" 2010 наадмын гранпри шагналт, хөгжмийн зохиолч Б.Мөнхжаргап жүжгийн хөгжмийг бичиж, аймгийн Хөгжимт драмын театрын найруулагч З.Далай найруулан тавьсан "Сүүтэй тангараг" жүжигт 1921 оны Ардын хувьсгалын гол удирдагч Дамдины Сүхбаатарын аж амьдралын тухай өгүүлжээ. Д.Сүхбаатарын дүрийг гоцлол дуучин Э.Амарбаатар, Н.Янжмаагийн дүрийг бүжигчин А.Ариунзул, эх дагинын дүрийг дуучин Д.Болортуяа, Элбэгдорж Ренчиногийн дүрийг дуучин Д.Батхуяг, Х.Чойбалсангийн дүрийг дуучин О.Батболд нар бүтээж, ерөнхий зураачаар Т.Гантулга ажиллажээ.