Парламентад суудалгүй таван нам нэгэн дээвэр дор нэгдэж сонгуулийн холбоотон боллоо. Сонирхолтой нь тэдний гурвынх нь дарга Монгол Улсын Ерөнхийлөгчийн 2005 оны сонгуульд бие биеэ нэг нүдээрээ ч харалгүй арцалдаж явсан эрхмүүд. УИХ-ын гишүүн дөрвөн эрхэм 2005 онд Ерөнхийлөгчийн сонгуульд өрсөлдсөн нь Төрийн тэргүүний төлөө хамгийн олон нэр дэвшигч оролцсон сонгууль болж байв. Хятадын эрлийз, хурлийз, хужаагаараа дуудалцан манаргаж явсан дөрвийн гурав нь өдгөө ойр дотнын түншүүд болов.

МАХН-ын дарга Н.Энхбаяр, МҮАН-ын дарга М.Энхсайхан, БНН-ын дарга Б.Жаргалсайхан нар нэгэн цагт Ерөнхийлөгчийн сонгуульд өрсөлдөж явснаа өдгөө УИХ-ын сонгуулийн түншүүд болоод байна. “Өрсөлдөж явснаа мартая даа” хэмээн тэд эвслийн гэрээнд гарын үсэг зурлаа. Харин дөрөв дэх өрсөлдөгч болох Эх орон намын дарга Б.Эрдэнэбат бизнесээ хөөгөөд сураггүй. Ингэж нэгэн суудлын төлөө арван гурван мэхээ уралдуулан хэлэх хэлэхгүйгээрээ дуудалцаж явсан гурав парламентад суудалтай болохын төлөө нэгэн дээвэр дор нэгдсэн сонин тохиолдол болов.