Азийн аваргаас зургаан медаль хүртлээ

Хуучирсан мэдээ: 2012.02.20-нд нийтлэгдсэн

Азийн аваргаас зургаан медаль хүртлээ

БНСУ-ын Гуми хотноо хоёрдугаар сарын 16-19-нд чөлөөт бөхийн насанд хүрэгчдийн Ази тивийн аварга шалгаруулах тэмцээн болж, Монголын тамирчид зургаан медаль хүртсэн амжилтаар өндөрлүүллээ. Өнгөрсөн жил Узбекистаны Ташкент хотноо болсон Азийн аваргаас эрэгтэйчүүд таван хүрэл, эмэгтэйчүүд гурван мөнгө, гурван хүрэл, нийт 11 медаль хүртэж байсан бол энэ удаад Ц.Баярзаяа /эм, 67 кг/, Б.Одончимэг /эм, 72 кг/ нар мөнгө, Б.Баянмөнх /эр, 60 кг/, Д.Хүдэрбулга /эр, 96 кг/, Ж.Чулуунбат /эр, 120 кг/, Э.Цэвэгмид /эм, 59 кг/ нар хүрэл медалийн эзэд болжээ. Хамгийн сүүлд Монголын чөлөөт бөхийн тамирчдаас ОУХМ Ч.Ганзориг 2006 онд, Гавьяат тамирчин Ц.Энхжаргал 2007 онд тивийн аваргад түрүүлж байжээ.

Эрэгтэйчүүдийн 60 кг-ын жинд барилдсан, О.Мөнхбат дасгалжуулагчтай “Сүлд” спорт хорооны тамирчин Б.Баянмөнх эхний тойрогт Туркменистаны бөх Батыр Боржаковыг 3:49, 4:0, 2:1 харьцаатай ялсан ч удаахь барилдаандаа Ираны бөхөд 1:3, 2:2 оноогоор дийлджээ. Ингээд дагах барилдаанд зодоглож, хүрэл медалийн төлөө Тажикистаны бөх Николай Ноевыг 2:0, 1:0 харьцаатай ялснаар тивийн аваргаас анхны медалиа хүртжээ. 96 кг-ын жинд хүрэл медаль хүртсэн Д.Хүдэрбулгын тухайд нэгдүгээр тойрогт Тайванийн бөх Вен Чень Хунг 6:0, 6:0 онооны харьцаагаар хожиж, хоёрдугаар тойрогт БНСУ-ын бөх Ким Жа Кангтай барилдаж, 0:1, 1:0, 0:1 онооны харьцаагаар дийлдэж, дагах барилдаанд Хятадын бөх Лижу Вуг 1:0, 1:0 харьцаатай ялснаар хүрэл медальд хүрч, Азийн аваргаас анхны медалиа зүүжээ. Харин ОУХМ Ж.Чулуунбат 120 кг-ын жинд нэгдүгээр тойрогт БНСУ-ын бөх Кунг Жин Намыг 5:0, 3:0, хоёрдугаар тойрогт Энэтхэгийн бөх Кумар Жодиндерийг 4:0, 1:0 онооны харьцаагаар дийлж, гуравдугаар тойрогт Ираны бөх Парвиз Хадид 1:0, 0:1, 0:2 онооны харьцаагаар өвдөг шороодож, дагах барилдаанд Японы бөх Нобиуши Аракадийг 3:0, 1:0 харьцаатай ялснаар хүрэл медаль хүртжээ. Тэрбээр ийнхүү тивийн аваргаас дөрөв дэх медалиа зүүсэн байна.

Эмэгтэйчүүдийн тухайд 67 кг-д Ц.Баярзаяа, 72 кг-д Б.Одончимэг нар мөнгө, 59 кг-д Э.Цэвэгмид хүрэл медаль хүртсэн байгаа. Түүнчлэн Э.Нарангэрэл /48 кг/,  Э.Сумъяа /55 кг/, Ш.Түмэнцэцэг /63 кг/ нар медалийн төлөө барилдаж, ялагдсанаар тавдугаар байрт шалгарчээ.  Улмаар эмэгтэйчүүд багийн дүнгээр тавдугаар байрт шалгарчээ.

Азийн аварга шалгаруулах тэмцээний дүнг танилцуулж байна.

Эмэгтэй 48 кг:

1. Чжао Шаша /БНХАУ/
2. Ю-Ми Ли /БНСУ/
3. Михрнисо Нурматова /Киргиз/
3. Ери Тосака /Япон/

Эмэгтэй 51 кг:

1. Ли Хью /БНХАУ/
2. Ю Мияхара /Япон/
3. Юнг-Жо Ким /БНСУ/
3. Н.Неха /Энэтхэг/

Эмэгтэй 55 кг:    

1. Канако Мурато /Япон/
2. Ти Дью Нинх Тран /Вьетнам/
3. Айжан  Исмагулова /Какакстан/
3. Геета Геета /Энэтхэг/

Эмэгтэй 59 кг:

1. Каеко Шимада /Япон/
2. Шенлайн Янг /БНХАУ/
3. Энхбаярын Цэвэгмид /Монгол/
3. Айым Абдильдина /Казакстан/

Эмэгтэй 63 кг:

1. Хуан Хи /БНХАУ/
2. Мин Вэнь Хуа /Тайвань/
3. Татьяна Захарова /Казакстан/
3. Рио Ватари /Япон/

Эмэгтэй 67 кг:

1. Елена Шалыгина /Казакстан/
2. Цэрэндоржийн Баярзаяа /Монгол/
3. Алтанай Кузу Анарбек /Киргиз/
3. Ксинью Лью /БНХАУ/

Эмэгтэй 72 кг:

1. Гюзель Манюрова /Казакстан, Азийн гурван удаагийн аварга/    
2. Бадрахын Одончимэг /Монгол/
3. Мами Шинкаи /Япон/
3. Ян Хонг /БНХАУ/

Эрэгтэй 55 кг:

1. Хасан Фарман Рахими /Иран/
2. Ясихиро Инабо /Япон, ДАШТ-ий хүрэл медальт/
3. Амит Кумар /Энэтхэг/
3. Жин Чол Ким /БНСУ/

Эрэгтэй 60 кг:

1. Йогешвар Дут /Энэтхэг/
2. Масуд Махмуд Эсмаэль Пооржоубари /Иран/
3. Банзрагчийн Баянмөнх /Монгол/
3. Томотсугу Ёшида /Япон/

Эрэгтэй 66 кг:

1. Мехди Тагави Кермани /Иран/
2. Максат Даыулбаев /Казакстан/
3. Парвеен Рана /Энэтхэг/
3. Жун Юнг Хо /БНСУ/

Эрэгтэй 74 кг:

1. Салех Саед Гударзи /Иран/
2. Абдулхаким Шапиев /Казакстан/
3. Такафуми Кожима /Япон/
3. Шанг Шонгуа /БНХАУ/

Эрэгтэй 84 кг:

1. Есхан Насер Лашгари /Иран/
2. Жае Синг Ли /БНСУ/
3. Ву Зижин /БНХАУ/
3. Наоки Момма /Япон/

Эрэгтэй 96 кг:

1. Магомед Мусаев /Киргиз/
2. Ким Жа Канг /БНСУ/
3. Доржхандын Хүдэрбулга /Монгол/
3. Ефран Морадали Амири /Иран/

Эрэгтэй 120 кг:

1. Парвиз Хади /Иран/
2. Лей Лианг /БНХАУ/
3. Жаргалсайханы Чулуунбат /Монгол/
3. Ержан Дуйсенбеков /Казакстан/

NewsMN Гар утасны хувилбар Татах
NEWS.mn

Мэдээллийн эх сурвалж