Германы Дюссельдорф хотноо болж буй Олон улсын жүдо бөхийн холбооны гран-при тэмцээний эхний өдөр Монголын жүдочид гурван мөнгө, хоёр хүрэл, нийт таван медаль хүртлээ. Түрүүлсэн бөхөд чансааны 200 оноо олгох Дюссельдорфын гран-прид дэлхийн 86 орны 550 гаруй жүдоч зодоглож байна. Харин Монголын баг эрэгтэй 13, эмэгтэй зургаан тамирчны бүрэлдэхүүнтэй оролцож байгаа юм.

Тэмцээний хуваарийн дагуу эхний өдөр эрэгтэйчүүдийн 60, 66, 73 кг, эмэгтэйчүүдийн 48, 52, 57, 63 кг-ын жингийн барилдаан болж, Монголын 10 тамирчин Дюссельдорфын татамид хүч үзсэнээс тав нь медалийн тавцанд гарлаа. 60 кг-ын жинд ОУХМ Г.Болдбаатар, 66 кг-д Монгол Улсын Хөдөлмөрийн баатар, Гавьяат тамирчин, дэлхийн аварга Х.Цагаанбаатар, 73 кг-д ОУХМ С.Ням-Очир нар мөнгөн медаль хүртсэн бол эмэгтэйчүүдээс 52 кг-д Гавьяат тамирчин М.Бундмаа, 57 кг-д Д.Сумъяа нар хүрэл медалийн эзэд боллоо.

Харин өнөөдөр /2012.01.19/ буюу тэмцээний хоёр дахь өдөр үлдсэн жингийн ангилалд аваргууд тодорно. Монголын жүдочдоос эрэгтэйчүүдийн 81 кг-д Г.Түвшинжаргал, О.Ууганбаатар, 90 кг-д Б.Амбасэлмаа, Э.Энхбат, -100 кг-д Б.Тэмүүлэн, Н.Түвшинбаяр, +100 кг-ын жинд Н.Батсуурь, эмэгтэйчүүдийн 70 кг-д Ц.Наранжаргал, -78 кг-д П.Лхамдэгд нар зодоглоно.