БНСУ-д амьдарч байсан монгол залуу тэндхийн иргэнд зодуулж, амиа алдсан тухай бид мэдээлсэн билээ. БНСУ-ын зарим мэдээллийн хэрэгслээр энэ тухай мэдээлсэн юм. Түүнд дурдсанаар Кёнги мужийн Пажү хотын цагдаагийн хэлтсээс мэдээлэл хийж, тус хотын Гвантан дүүргийн Чанман хороонд байрлах дэлгүүрийн гадна БНСУ-ын иргэн, 31 настай Ха Му гэх залуу 28 настай Б гэгч монгол залуугийн амь насыг хөнөөсөн гэжээ. Мөн Цагдаагийн газрын мэдээлснээр БНСУ-ын иргэн Ха гэгч нь гадаа хүйтэн байхад дэлгүүрийн хаалгыг онгорхой орхиж гарснаас болж уурлаж, Б-г зодсон байна. Харин Б эмнэлэгт хүргэгдэх замдаа амьсгал хураажээ. Гэмт этгээдийг саатуулаад байгаа бөгөөд хэргийг шалгаж байгаа ажээ.

Дээрх хэргийн талаар Гадаад харилцааны яамны Консулын газрын дарга Д.Ганхуягаас тодруулахаар утсаар холбогдсон боловч “Бидний зүгээс утсаар ямар ч мэдээлэл өгөхгүй. Ирэх даваа гаригт албан ёсоор мэдээлэл хийнэ” гэх хариу өглөө.