Нийслэлийн агаарын бохирдлыг бууруулах тухай Монгол Улсын хуулийн хэрэгжилтийн дагуу гэрийн эсгийг технологийн бүрэн дамжлагаар үйлдвэрлэх, чанарыг нь сайжруулахын тулд стандартад нэмэлт өөрчлөлт орууллаа.  Стандартчилал, хэмжил зүйн Газар, Ноосон нэхмэл үйлдвэрлэгчдийн холбоо болон ШУТИС-ийн Нэхмэлийн хүрээлэнтэй хамтран энэхүү өөрчлөлтийг хийжээ. Ингэхдээ гэрийн эсгий болон гэрийн даавуун бүрээс, машинт аргаар үйлдвэрлэсэн ноосон эсгий, гэрийн хөшигний үндсэн хэмжээ, техникийн шаардлагын стандартыг шинэчилсэн байна.  

Тухайлбал, ноосон эсгийний галд тэсвэрлэлтийн үзүүлэлтүүдийг ISO стандартын үзүүлэлттэй дүйцүүлж оруулснаас гадна дулаан хадгалалт, дамжуулалтын үзүүлэлтүүдийг дээрх олон улс, бүс нутгийн стандартуудтай харьцуулан оруулсан байна. Эдгээр шинэчилсэн стандартын төслүүдийг Стандартчиллын үндэсний зөвлөлийн 2012 оны хоёрдугаар сарын 16-ны өдрийн хурлаар хэлэлцэн баталжээ. 

Дээрх өөрчлөлт хийснээр гадаадаас орж ирдэг чанаргүй, шатамхай нийлэг материалтай хаягдал түүхий эдээр хийсэн эсгий, эсгийнцэр ашиглахыг хязгаарлаж, технологийн бүрэн дамжлагын дагуу, үндэсний үйлдвэрлэгчдийн хийсэн цэвэр ноосон эсгийг хэрэглэх боломжтой болох гэнэ. Түүнчлэн олон улсад ахуйн зориулалтаар өргөн хэрэглэгдэх болсон дэвшилтэт хими, нанотехнологийн боловсруулалттай ус нэвтрүүлдэггүй даавуугаар хийсэн бүрээсийг хэрэглэх бололцоотой ажээ.