Зарим хэвлэл, мэдээллийн хэрэгслээр “Олон жолоочийн эрх хассан цагдаад Замын цагдаагийн газраас байр өгөх болзолт уралдаан зарласан. Тиймээс хамгийн олон жолоочийг торгож, жолоо барих эрхийг нь хассан цагдааг байраар урамшуулна” гэх утга агуулга бүхий мэдээлэл гарсантай холбогдуулж, ЗЦГ-ын дэд дарга, хурандаа Ч.Жаргалсайхан сэтгүүлчдэд мэдээлэл хийлээ. Тэрбээр юуны өмнө дээрх мэдээлэл эндүү ташаа болохыг албан ёсоор мэдэгдээд, замын хөдөлгөөний дүрэм зөрчсөн жолооч нарын торгуулийн мөнгө төрийн дансанд ордог бөгөөд үүнийг Замын цагдаагийн алба захиран зарцуулах эрхгүй гэдгийг онцлов.

Мөн тэрбээр Замын цагдаагийн газар нь төсөв мөнгөний хүрэлцээ багатай тул сүүлийн 22 жилийн хугацаанд нэг ч албан хаагчид орон сууц бэлэглээгүй, нийт албан хаагчдын 70 хувь нь гэр хороололд амьдардаг, аймаг, дүүргийн Засаг дарга нь ганц, хоёр удаа замын цагдаагийн албан хаагчдад гэр бэлэглэж байсан тухай дурдсан юм.