Шударга өрсөлдөөн хэрэглэгчийн төлөө газрын улсын байцаагчийн баталсан удирдамжийн дагуу хиам үйлдвэрлэгчдийн үйл ажиллагаа, өрсөлдөөний тухай хуулийг зөрчсөн эсэхэд хяналт  шалгалт хийжээ. Шалгалтаар нэр бүхий  12 хиам үйлдвэрлэгч аж ахуй нэгж үгсэн хуйвалдаж, үнээ нэмсэн болох нь тогтоогджээ. Хиам үйлдвэрлэгчид “Хүнс комплекс” компанийн байранд өнгөрсөн нэгдүгээр сарын 28-нд  хамтарсан хурал зохион байгуулж, харилцан мэдээлэл солилцсон нь үнийг хэлэлцэн тогтооход чиглэсэн гэж улсын байцаагчид дүгнэсэн байна. Нэр бүхий 12 үйлдвэрийн хиамнаас гадна зах зээл дээрх хиамны үнэ тэр өдрөөс хойш 1000-1300 төгрөгөөр нэмэгдсэн болох нь хяналт шалгалтаар тогтоогджээ. Энэ талаар Шударга өрсөлдөөн хэрэглэгчийн төлөө газрын улсын байцаагч Б.Шижирбаатараас тодрууллаа.

-Хиамны үйлдвэрүүд үгсэн хуйвалдсан үйлдэлд ямар хариуцлага ногдуулах вэ?

-Үнээ үндэслэлгүй нэмсэн үйлдэл нь Өрсөлдөөны тухай хуулийн 11.1.1 дэх заалтыг  зөрчсөн. Тиймээс үгсэн хуйвалдаж, үнээ нэмсэн  12  үйлдвэрлэл эрхлэгчид өмнөх жилийн борлуулалтын орлогын 0.5 хувьтай тэнцэх хэмжээний төгрөгөөр торгох арга хэмжээ авахаар болсон. Бас зөрчлөө арилгаж, хэвийн болгуулах улсын байцаагчийн албан шаардлага хүргүүлээд байна.

-Өмнөх жилийн борлуулалтын орлогын 0,5 хувийн торгууль гэдэг нь хэдий хэмжээний мөнгөн торгууль болж байгаа вэ?

-Одоогоор энэ нь тодорхойгүй байна. 2011 оны аудитын үнэлгээ гармагц өнгөрсөн онд тухайн аж ахуй нэгжүүд борлуулалтын орлогоос хэдэн төгрөгийн ашиг олсон нь тодорхой болох юм. Өрсөлдөөний тухай хуульд заасан торгуулийн хэмжээ нь  аж ахуй нэгжийг дампууруулахад чиглэдэггүй. Харин алдаа дутагдлаа дахин  гаргахгүй байхад чиглэдэг.