Цөмийн энергийн газрын дарга С.Энхбатыг ажилдаа хариуцлагагүй хандсан гэдэг үндэслэлээр буруутгаж, албан тушаалаас нь огцруулах шийдвэрийг Засгийн газраас гаргасан билээ. Гэвч С.Энхбат дарга дээрх шийдвэрийг хүлээн зөвшөөрөлгүй, хуулийн байгууллагад хандаад байгаа юм.  Түүнийг мөн цөмийн хаягдлыг Монгол Улсад булшлах талаар нэр бүхий хүмүүс өмнө нь ярьж, ажил хэрэг болгох гэж байсан тухай мэдээллийг холбогдох байгууллагынханд өгсөн гэх мэдээлэл бий.  Энэ талаар Цөмийн энергийн газрын дарга С.Энхбатаас тодруулахад “Цөмийн хаягдал булшлах талаар хэлэлцээ хийж, ярьж байсан нь үнэн. Тэр хүмүүсийг хуулийн байгууллага шалгах байлгүй. Энэ мэдээлэл олон улсын болон Монголын хэвлэл, мэдээллийн хэрэгслээр цацагдаж, шуугиан тарьсны дараанаас энэ асуудлыг  дарчихсан. Одоо харин дахин хэлэлцээ хийх эсэх нь тодорхойгүй байдаг” гэсэн хариултыг өглөө.

Сануулахад, өнгөрсөн жил олон улсын томоохон хэвлэл, мэдээллийн хэрэгслүүд Монголын нутагт цөмийн хаягдал булшлах тухай мэдээлж эхэлсэн нь шуугиан тарьсан юм. Хэрвээ Цөмийн энергийн газрын дарга  С.Энхбатын ярьсан нь  нотлогдвол эх орныхоо үндэсний аюулгүй байдалд нөлөөлөх хорт бодисыг хадгалах талаар ярьсан  гэх хүмүүс  эх орноосоо урвасан хэрэгт орох бололтой.