Ардчилсан намын бүлэг өнөөдрийн хуралдаанаараа Батлан хамгаалахын сайд Ж.Энхбаяраас зарим асуудлаар тодруулга авахаар төлөвлөж байсан ч энэ удаад хойшиллоо. Зарим эх сурвалжийн мэдээллээр бол Батлан хамгаалахын сайд Ж.Энхбаяр энэ албаа авснаас хойш хууль бус томилгоонууд хийснээс гадна ямарваа жагсаал, цуглааныг тараах зорилгоор мэргэн бууч бүхий хоёр ротыг бэлтгэх  саналыг сайдын зөвлөлийнхөө хурал дээр танилцуулжээ. Хэрэв иргэдийн эсрэг тусгай ажиллагаа явуулах үүрэг бүхий цэрэг бэлтгэхийг санаархаж буй нь үнэн бол ноцтой асуудал гэж Ардчилсан намын бүлэг үзжээ.

Ардчилсан намын бүлэг Батлан хамгаалахын сайдтай холбогдох дээрх асуудлыг судлах ажлын хэсэг байгуулсан байна. Ажлын хэсгийг гишүүн Э.Бат-Үүл, З.Энхболд, Н.Батбаяр нарын бүрэлдэхүүнтэй байгуулжээ. Хууль бус томилгоо хийсэн, тусгай ротыг иргэдийн эсрэг бэлтгэхээр болсон зэрэг асуудал нь нотлогдвол Ж.Энхбаярыг огцруулах саналыг Ардчилсан намын зүгээс тавих нь зүй гэж үзсэн байна.

Ардчилсан намын бүлгийн хуралдаан асуудлын дарааллын дагуу батлан хамгаалахын салбартай холбоотой дээрх мэдээллийг хэлэлцэх болоход Ж.Энхбаяр хуралд оролцох боломжгүй гэсэн юм байна. Ингээд Ардчилсан намын бүлгийн хуралдаан өндөрлөжээ.