Чингэлтэй дүүргийн шүүхийн Эрүүгийн хэргийн танхимд  өнгөрсөн баасан гаригт Зоос банкны захирал асан Ш.Чуданжийд холбогдох хэргийг хэлэлцэж түүнд зургаан жилийн хорих ял оноосон билээ. Хэдийгээр түүний гэм буруутай нь шүүхээр тогтоогдсон ч 2009 онд баталсан Өшөөл үзүүлэх тухай хуульд хамруулан хорих ялыг биечлэн эдлүүлэхгүй байхаар шийдвэрлэсэн. Учир нь Өршөөл үзүүлэх тухай хуулийн 4.1.2-т зааснаар анх удаа гэмт хэрэг үйлдсэн, 18 насанд хүрээгүй хүүхэдтэй эмэгтэй, жирэмсэн эмэгтэйд оногдуулсан ялын хугацааг харгалзахгүйгээр эдлээгүй үлдсэн болон нэмэгдэл ялыг өршөөн хэлтрүүлнэ” гэж заажээ. “Зоос” банкны захирал асан Ш.Чуданжийгийг банкны хөрөнгө үрэгдүүлсэн гэх хэрэг хүнд хэргийн ангилалд багтах ч 18 нас хүрээгүй хүүхэдтэй учир дээрх зүйлчлэлд хамрагдан өршөөгдсөн байна.

Түүнийг тус банкны хадгаламж эзэмшигчдийн  нэг тэрбум  600 сая төгрөгийн хохирлыг нөхөн төлүүлэхээр шийдвэрлэсэн. Өнөөдрийн байдлаар шүүхийн шийтгэх тогтоол хүчин төгөлдөр болоогүй, шүүхийн шийдвэрийг хүлээж аваагүй байгаа учир дээрх хохирлыг хэрхэн барагдуулах нь тодорхойгүй байна. Шүүхийн шийдвэрийг хүлээж авсны дараа Ш.Чуданжий давж заалдаж магадгүй аж. Зарим мэдээллийн хэрэгслээр уг хэргийн хохирогч нь Сангийн яам учир Ш.Чуданжий 1.6 тэрбум төгрөгийг Сангийн яаманд төлнө гэх мэдээлэл гарсан. Энэ талаар албаны эх сурвалжаас тодруулахад “Зоос” банкийг Банкны тухай хуулиар татан буулгах шийдвэр гарснаар эрх хүлээн авагчийг томилогдсоноор хувьцаа эзэмшигчдийн эрх дуусгавар болно гэж  заасан. Тэгэхээр банк татан буугдснаас хойшхи бүх хохирол, төлбөр тооцооны асуудал  эрх хүлээн авагчид шилждэг. Дампуурлын хуулиар эхлээд улсад төлөх татвар, ажилчдын нийгмийн даатгал зэрэг өр төлбөр барагдуулна. Хэрэв мөнгө үлдвэл хувьцаа эзэмшигчид олгодог. Тиймээс Сангийн яам хохирогч байх үндэслэлгүй” гэх хариулт өглөө.

Уг хэрэгт холбогдсон ТУЗ-ийн дарга асан Д.Батбаяр, Сангийн яамны Төрийн сангийн газрын дарга Х.Пүрэвсүрэн, Монголбанкны ерөнхийлөгч Л.Пүрэвдорж нарын гэм буруутай нь нотлогдоогүй учир хэрэгсэхгүй болгосон юм.