Дундговь аймгийн Ардчилсан намын хорооны гишүүд Бээжин, Чежүгээр зургаа хоног аялаад эх орондоо дөрөө мулталлаа.  Аймгийн намын хорооны гишүүд, хяналтын зөвлөлийн гишүүд оролцсон 67  хүний бүрэлдүүнтэй энэ аялагчид  хоёр хоногт Бээжин хоттой танилцаж алдарт  уран барилгын шийдлийн өндөр түвшинд олон зуун архитекторын ур ухаанаар бүтээгдсэн “Шувууны үүр” цогцолбор,  амьтны хүрээлэн, Тянь-ань-миний талбайгаар аялаж   БНСУ-ын үзэсгэлэнт Чежү арлыг зорьсон юм.  Байгалийн үзэсгэлэнт дэлхийн шинэ долоон гайхамшгийн нэгэнд  нэр дэвшсэн 77 газраас шалгаран багтсан  Чежү арал,  тэндхийн аялал жуулчлалын  гол төв, цэцэрлэгт хүрээлэн, Монголын түүхэнд холбогдох газрууд, хүн ардын нь зан үйл, аж амьдралтай танилцан далайгаар аялсан нь аялагчдад  өндөр сэтгэгдэл төрүүллээ. Аялалыг сонирхолтой, адал явдалтай, үзэж харах баялаг хөтөлбөртэй болгоход “Нью жуулчин тур” компани, түүний марктингийн менежер Б.Алтай онцгой анхаарсанд аялагчид талархаж байлаа. Аялагчдын бүрэлдэхүүнд Ардчилсан намын Үндэсний зөвлөлдөх хорооны гишүүн Б.Мөнхболор, М.Энхбат, Сайхан-Овоо, Гурвансайхан сумын ИТХ-ын дарга Б.Өлзийт, Р.Сүхбаатар, Өлзийт, Дэлгэрхангай, Сайхан-Овоо сумын Засаг дарга Ш.Энхбат, Ж.Өлзийжаргал, С.Амарсанаа, МоАХ-ны аймгийн зөвлөлийн дарга Ж. Мөнхтөр нар орсон юм.

Аялагчдын хамгийн сонирхол татсан үзвэр нь дэлхийн хамгийн том морин шоугаар шалгарсан “Чингисийн догшин хар сүлд”  тоглолт юм. Дөрвөн мянган хүний суудалтай задгай цэнгэлдэхэд тавь жаран морьтой  Монгол залуус давхилдах циркчилсэн тоглолтын үйл явдал  нь Чингис хаан, Жамух хоёрын бага, идэр насны амьдрал,  байлдаан тулааныг харуулсан утга төгөлдөр юм.  Монгол циркчдийн чадвар, моринд гарамгай Монгол залуусын ид хавыг гайхуулсан энэ тоглолт өдөрт гурван удаа  болдог ч суудал байнга дүүрэн байдаг нь  манайд ч иймэрхүү морин шоу  хэрэгтэйг харуулж байна.